بني آدم

2008-02-15T19:37:00.000-08:00

الجمعة 15-2-2008

النهاردة الصبح بعد الصلاة نزلت أنا وأختي ندور على صيدليات رحنا مكتب اسمه فارمازون جنب البيت مالقيناش عنده صيدليات حلوة رحنا نازلين على مكتب تاني لسمسرة الصيدليات برده في روكسي لقينا عنده كام صيدلية ينفعوا قلنا هننزل نتفرج عليهم يوم الإثنين اللي جاي اللي هو أجازتي و ربنا يكرم

موضوع الصيدلية ده شاغلني موت ......أحيانا أقول ما أهو أنا صيدلي وفي الآخر لاوم هاقتح صيدلية و أحيانا تانية اقول لا ده وجع قلب والدنيا بقت كلها سكك حرامية وعشان تنجح لازم ترشي وتلف على القوانين وتسرق ووو يعني حاجة اع مالهاش لاومة

بس هو البديل بالنسبة لي ايه أروح اتنطط عند الدكاترة عشان أقنعهم بدوا واتلطع بالساعات وفي المقابل اخد عربية و الف ونص في الشهر

في شغلانة مالهاش مستقبل ولا أفضل في صيدليتي معزز مكرم بس مع أول خناقة مع صاحب الصيدلية القلي نفسي كأني لسه متخرج

وللا ادفع ابويا وأمي اللي وراهم واللي قدمهم و اقدم على هجرة من البلد الوسخة ده بس يا عالم هاتقبل ولا لا و هانجح هنالك ولا لا

عامة نحمد ربنا إني عندي خيار فتح الصيدلية ده أصلا غيري نفسهم ومش لاقيين بس برده أنا أخري ااجر صيدلية (مافيش فلوش للشراء )إنما فرش و ديكور ووو موجود وربنا يكرم

2008-02-14T18:55:00.000-08:00

خلاص حاسس إني هاتخنق و هاكتئب وريحتي هاتطلع

عايز أعمل اي حاجة غير الشغل والشغل والشغل

أقولكوا هاتكلم عن الشغل ماهو الحاجة الوحيدة اللي بعملها طب أقولكو فكرة أجمد هاكتب مذكرات شغل على غيره أهو الواحد يتسلى

اليوم- الخميس 14-2-2007

هاقلكوا بس مقدمة عشان تبقوا معايا عالخط

يوم الخميس و الجمعة في الصيدلية بيبقوا قمة الجد بالنسبة لي بابقى فيهم مدير الشيفت المسائي ودي للعلم مسؤلياته إنه يتخانق مع الزباين و يشوف الصيادلة بيشتغلوا ولا بيدلعوا هم والدليفرية والأمن وووو ويحل مشاكل الناس و ريعد الفلوس ويعرف ايه سبب العجز أو الزيادة

و بعدين يروح بيتهم

ربنا بيبقى مهلي إني طول الأسبوع بيبقى فيه مدير شيفت _ ما بيجيش خميس وجمعة وانا بابقى حيالله صيدلي زيي زي غيري

ولو إنني في الغالب أنا برضه اللي بقفل الخزنة بس ببقى مسقع خالص ........يعني بنفض للمشاكل

والمشاكل عندنا في الصيدلية وفي أغلب صيدليات الأماكن اللي بيقولوا عليها راقية بتبقى بسبب الزبون نفسه اللي حاسس إنه مفروض نبلع له الزلط و ندلعه ونهشتكة ونعمل له خصم ما دام بيدفع شئ وشويات كل شهر في كلام فاضي مالوش لازمة خاصة بقى لو كان راجل مهم ولا فنان مشهور ولا لاعب كرة معروف ولا اي حاجة فكسانة كده يحس إنه أهم واحد في الدنيا

ولأننا صيدلية استهلاكية بكل معاني الكلمة فلازم نلبي لعم الدلوع طلباته (يعنى واحد أهبل وعايز يدفع الف في ابو قرشين نقول له لأ) و مش مشكلة ندلعه شوية ونهشكة ونقول له ننه نام كمان

الواحد ممكن يعصر على نفسه لمونه ويدلع كتير ويتغاضى عن غباء وجهل الزباين واستعباطهم ووووووبس المشكلة بقى لما يتنرفزوا......ما هو المثل بيقوللك الزبون دائما على حق بس المصيبة إنه عمره ما بيكون على حق يعني برده عشان ما نظلمش في تسعة وتسعين في المية من الحالات

يعني ممكن تلاقي واحدة بتتخانق عشان قلم الانسولين اللي طلبته مجاش معاه سن ...طيب يا ستي انتي طلبتي سن ؟؟ لأ أمال هنعرف منين إن جنابك عايزه سن ؟؟؟؟ترد تقول أمال هاخده إزاي نقولها ما هو تلات اربع الناس بتخلي عندها علبة سنون أو حتى عشر سنون ولما بتخاص بتجيب غيرهم (زي الحقن كده هو كل واحد عايز حقنه لازم ابتله معاها سرنجة إفرض مش عايز لو قال عايز نديله ماقالش منديلوش) تبدأ الزربنة وانتا مش عارف انتا بتكلم مين وانت فاكر إنك هتديني درس في الأدب وووو

حاجة توجع البطن

وللا التاني اللي جه على وايتين (خاصية النتظار )ورجعنا له تاني لقيناه عمال يقول ازاي تسيبوني انا زبونكم عيب كده طيب يا سيدي ما الراجل اللي في الناحية التانية ده مش ابك كلب يعني عامة متأسفين حضرتك عايز ايه فيرد بكل بجاحة عندكوا شوكلاته ايه؟!!!!!!!!!!ارحم ياللي بترحم

وللا اللطع اللي جايلنا بعد ما قفلنا عايز محلول عدسات قلنا معلش نفتح نجيبله الحاجة بعد ما يخادها يطلع ورقة بمتين يابا احنا قفلنا يعني ما فيش فكه ......يقول وانا كمان معاييش فكه طب ياباب روح فك واحنا هنستناك لا فكو انتوا انا على اديا نقش الحنة يابا احنا عايزين نروح بقى في ليلتك دي...............خلاص ادوهاني وانا هابقى احاسبكم عليها بعدين (حدش شاف طعامتك) وكنت ابيديت اركب دماغي اني مش هابعله أساسا لحد ما واد دليفري من بتوعنا قرر إنه يعمل فيها بنط جدعنة ويدفع من معاه ويروح مع الراجل بيتهم ياخد الفلوس أو يفكله المهم إنه غارفي ستين داهية

أشكال وسخة الواحد بيقابلها كل يوم بس نعمل ايه قدرنا كده

ده غير الدكاترة كل واحد له حياته ومشاكلة والسيطرة عليهم دون خناقات أمر ليس بالسهل أبدا

أما الدليفري ففئة خاصة جدا من الشعب انتشرت في الآونة الأخيرة بسبب الرفاهية الزائدة

هذا غير عمال النظافة والكاشير والأمن دنيا كاملة داخل جدران الصيدلية العريقة

ده غير البوب الكبير صاحب الصيدلية الذي عاد لتوه إلى أرض الوطن من بلاد العم سام وحكاياته التي لا تنقطع

يعني بجد الصيدلية بتاعتنا دي تنفع تتعمل مسلسل من بتوع الديكور الواحد دول وكل شوية أحداث كتير ودنيا

فأنا بما إني مش لاقي حاجة أحكيها هاحكي عليها

لنفسي أولا ثم لمن يهمه الأمر

تكملة

2007-11-17T17:28:00.000-08:00

عارفين ايه المشكلة المشكلة إن الدنيا زي ماتشات الكورة
غير إنها يوم ليك ويوم عليك وغير إنها صعبة التوقغ الشيء المميز إنها استنباط
يعني الماتشات خمس أو ست انواع يا فريق بيهاجم والتاني بيدافع ياللي اتنين فاتحين اللعب يالليتنين بيموتوا الماتش ياواحد مستحوذ على الكورة بدون فاعلية يعني كام نوع

واحنا حياتنا برضه كده يا تهاجم يا تدافع ويا تطفش الكورة وتلعب بمدأ السلامة يايايكام نوع كده مش كتيرا وكل طريقة لعب وليها مزاياها وعيوبها و إن ظلت طريقة الهجوم دائما الأفضل والأكثر تعريضا لدخول اهداف

من المشابهات كذلك بين الكورة والدنيا إن الواحد من كتر ما بيتفرج على كورة ممكن بعد خمس دقايق من الماتش يعرف الماتش هيخلص كام ودي اللي بيسموها في الدنيا بالسنن

لسه لغاية دلوقتي المشكلة ما ظهرتش ....... صح المشكلة بقى نلعب إزاي ما هو ممكن الواحد يهاجك طول حياتوا وساعتها الطبيعي إنك ممكن يتم عرقلتك وأو تتصاب أو ييجي فيك جون نتيجة إنك فاتح دفاعك أو أو .............أو لو لعبها صح ممكن تكسب وتبقى حققت أهدافك مع وجود بعض الإصابات الطفيفة أو الغير طفيفة

أو ممكن تلعب مدافع على الهجمة المرتدة بس في الحالة دي غالبا مش هييجي فيك اجوان ولا انت هتدخل اجوان بس الماتش هيبقى بايخ بس التعرض لإصابات هيبقى قليل

أهو الناس كلها يوم ما بتبلغ بتبتدي ماتش ماهياش عارفة هيخلص امتى ............و لا هما عارفين الجون فين .....ما هو الجون هما اللي بيحددوا بعد فترة ولا حتى جونهم اللي مفروض يدافعوا عنه فين .......برضه بيعرفوه مع الوقت.............ولا مين خصمهم أصلا والأهم من كل ده هم بيلعبو الماتش ليه أصلا

بس الحاصل إن كل واحد بيبقى مطلوب منه إنه ينقي طريقة لعب ويدور على هدف يجيب فيه ويدور على جونه هوه عشان يحميه

وفجأة يلاقي قدامه واحد تاني هدفه غيره خالص يمكن يكون جون الأول هو مرمى التاني طب ليه يا جدعان ما الطيب أحسن ................ ونلاقي الناس بتتخانق وتقوم وتقعد وووو بس هي النقطة الأساسية اتنست احنا بنلعب ليه أصلا

دايما واحنا صغيرين كانوا بيصورولنا إن الملك فاروق دا راجل وحش وطاغية والضباط الأحرار دول وطنيين وكانوا بيصورلنا في الأفلام زي في بيتنا رجل إن قتل رجال ما قبل الثورة المفسدين حاجة كويسة

الحقيقة إن ده كان هدف الثورة ..............تلويث صورة ما قبلهم لإقناع الناس بأنهم كانوا يجي أن يأتوا لوكن وبما إن الطرف التاني كان انسحب ساعتها من الماتش فماكانش فيه لا دفاع ولا هجوم عكسي...............دلوقتي ابتدا يبقى فيه دفاع شوية وهجوم على رجال الثورة نفسهم واتهمهم بالمسؤلية عما آلت اليه الأوضاع في مصر دا بقا هدف ناس تانية وهكذا الدنيا

المشكلو بدأت تظهر يتهيألي كده................ يعني حينما جاء النبي محمد عليه الصلاة والسلام كان هدفه نشر دعوتة وإلغاء عبادة الأصنام اللي هو المرمي اللي باقى العرب بتدافع عنه وقتها لأنه كان بالنسبة لقريش مصدر غناها وفكان من الطبيعي إنها تعاديه وتجعل منه ومن دعوته هدفا لها تسعى لإسقاطة

وضح اللي أنا اقصده المشكلة إن الناس في الدنيا مش عايشين بمبدا بتاع ستيفن كوفي
win/win

لادا الطبيعي في الدنيا إنك تعيش فيالدنيا بمبدأ
win/ lose lose/win

يعني إحنا عاشين في الدنيا لكي نحقق أهدافنا نسحق مرمي الآخرين إن كانت أهدافنا وندافع عن مرمانا من هجوم كثيف للبعض الآخر من الناس الذين يروا مرمانا أهدافا لهم و يسعون لدك أسوارنا ونستعين بالحلفاء ونستعدي خصوم وووووووووو

لماذا

لأن الدنيا هكذا.........أوليست تلك مشكلة بحد ذاتها أوليس هذا مدعاة للقرف في حد ذاته

إذا دققت النظر جيدا لن تجد أحدا يكن لأاحد ضغينة منذ الولادة ولكن أهدافهم التقت فصار من واجب كل منهم أن يدافع عن هدفه دون أن يحاول أن يفهم الآخر لأن هدف الآخر وحياته ليست حياته هو فهو لا يعبأ بها

يعني في كل حرب بين أي جبهتين لو وقف الفريقين أمام بعضهما و رأي كل طرف لما يحارب هذاالآخر وتفهم لربما آاثرا عدم القتال
ونعلم جيدا أن النبي قال في غزوة بدر للصحابة لا تقتلوا العاص بن وائل العباس لأنهما خرجا مكرهين

يعني في ناس بتروح فطيس في النص

انظروا إلى العراق إلى افغانستان ألى برج التجارة العالمي إلي صراع الحكومة والإخوان المسلمين إلى حروب اسبانيا بنوعيها حروب الغزو ثم حروب الانتصار الى حروب الصليبيين كلها ألى الفتوحات الإسلامية إلى كل صدام بين اثنين إلى كل كل رجال الأعمال وصفقاتهم التي يكون انتصار احدهم فيها انهزاما للآخر

انظروا حتى إلى حالت البيع والشراء والفصال والتلبيس في الصيدليات و الاحتكار والمقاطعات ووووو

هي الدنيا كده
مش فكره طيب وشرير ولا إن حد صح والتاني غلط لا الصح والغلط دول بيبقوا في طريقة اللعب يعني تونس مثلا لاعيبتها بيمثلوا كتير عشان يضيعوا وقت وامريكا مثلا بتضرب دولة بعد الحرب بقنبلو نووية أو بتضرب أطفال عزل بالكيماوي في العراق
اهو هو ده الضرب اللي تحت الحزام و هو ده الغلط والحرام إنما كون الضرب نفسه يحصل

هي الدنيا كده

طب ليه
دا لأننا في عالم بشع فيه مأساة من ال
miss-communication

وغير كده ما هو لو كل الناس بقى ليها جون واحد يبقى مافيش ماتش أصلا ويبقى نروح أحسن

هي الدنيا كده
وانا قرفان من كونها كده لازم اعادي ناش نعرفهمش ليه كده غلاسة ولازم الاقي ناس غريبة بتهاجمني وانا اساسا ماليش علاقة بيهم ليه هي الدنيا كده

طب بالذمة نبقى تروس بتلف عالفاضي وللا لا
عذرا للتطويل

هاكتب تاني

2007-11-14T20:24:00.000-08:00

انا رجعت اكتب تاني بعد توقف وعارف إتني هاجع اتوقف وارجع اكتب هي الدنيا كده بس المرة دي المدونة هتبقى طويلة شوية لأنها نوع من الفضفضة كنت كاتمة بقاله كتير......من شهر تسعة اللي فات

فيه ييجي خمسمية حاجة بيلعبوا في مخي وانا من النوع اللي لما الحاجة تلعب في مخة ما ينطرهاش لا يقعد يكتمها لغاية لما تطلع باستنتاج وبعدين ابقى اقولها لاصحابي واسمع ارائهم يقوموا يا يدعموا الاستنتاج ده يا يفندوه وبكده احس اني انعلمت حاجة زيادة وفهمت حاجة زيادة
انا بقى الفترة اللي فاتت كان فيه كام حاجة كده عمالة تتخمر وآن الاوان اني اتكلم فيها مع اصحابي ولانهم مشغولين قلت اكبها عشان منساهاش لحد ما يفضوا والاقيهم

أولا انا حاسس لأول مرة في حياتي إني مش عارف انا عايش ليه بجد والله عندي حالة بلاده غير طبيعية..... يمكن عايش عشان اعمر الأرض ......طب اعمل ايه يعني مانا بشتغل وبفحت نفسي شغل كل يوم اتناشر ساعة شغل طب وبعدين يعني لا بجد انا مش فاهم شوية وهحوش وبعدين اتجوز واجيب عيال واربيهم ويكبروا واجوزهم واموت ............بس كده طب ايه يعني لا بجد يعني هي الدنيا كده وخلاص

طب أمال اشترك في هيئة سياسية يتقبض عليا فيها مثلا ويضيع مستقبلي وافضل طول حياتي مسجل خطر بسبب وبدون سبب لاسباب مالهاش لازمة وافضل طول حياتي متمطوح بين الاقسام ولما استريح شوية عضو من الهيئة دي يحن عبليا ويجيبلي شغل و اتجوز واجيب عيال افضل اربيهم اني ممكن اروح السجن في اي وقت في سبيل ولا حلاجة......................ده الطبيعي مثلا؟ معلش خليني ارجع للموضوع ده في الآخر تاني

وللا اغامر واسافبره واعيش ملك واكسب شيء وشويات واتجوز مزه امريكانية وللا سويدية .............هه وبعدين هوه اده السؤال؟
وللا ادخل الحزب الوطني أواتعرف على ده وده ويبقى ليا هنا بيزنس وهنا بيزنس ويبقى لي سلطة واقب على وش الدنيا واتجوز جوازة جامدة وافتح مشروع جامدو ابقى مليونير هنا...... المهم هه وبعدين؟
المشكة اني مش لاقي بعدين دي خالص

على رأي الأبنودي
تروس بتلف عالفاضي

أنا بجد حاسس إني ترس عمال يلف انما ليه مش عارف..........أنا عارف إن الناحية الدينية عاندي واقعة موت الأيام دي ويمكن عشان كده بحس الأحاسيس دي بس ده لأني حاسس إن كل شيء في الدنيلا مالوش لازمة .....بجد

يللا بلاش أطول عشان الحق انام وبكره أكمل

أنا كنت عارف إن ده هيحصل

2007-08-15T16:34:00.000-07:00

البني آدم ما يملاش عينه إلا التراب .............بدأت أشك إني كنت فاهمها صح لأن بجد لما الواحد يعيد شريط الأسبوعين اللي فاتو دول ميت مرة يقول أكيد في حاجة غلط
المدونة دي عبارة عن فضفضة من واحد كان على حافة الجنون الاسبوع ده

أنا كان مشكلتي إني تعبان عشان بشتغل في صيدليتين وما عنديش وقت أهرش وكان في عامل الصبح مغلبني وكنت بشخط فيه كتير مع إني أكره ماعليا الشخيط فجيت على الآخر وكنت بتحاشاه وبعدين مرتبي زاد بالليل قلت الحمد لله نسيب الصبح بماشكله ونخلينا بالليل وتزامن ده مع قدوم دكتور جديد في الصيدلية يتاعت بالليل كان صاحب صاحبي فانبسطت أوي وقلت الةاحد هيشوف يومين حلوين بعد التعب والبهدلة
والله كان نفسي ارتاح
بس واضح إنه ما بنفعش قبل ما اسيب صيدلية الصبح بيومين صاحب صيدلية بالليل كلفني إني أبفى مساعد مدير الشفت وأحل محله في غيابه- أصل احنا بنبقى تمانية في الشفت في عين العدو- .......أنا قلت أهي وظيفة شرفية مالهاش لازمة و كله تمام بعديها بيوم واحد اتخنقت مع مدير الشفت اللي هو في الأصل صاحبي بسبب هايف جدا قلت مش مشكلة أهو حبه وهترجع المية لمجاريها.........وتركت صيدلية الصبح وأنا أمني نفسي بأيام هنيئة وأجازة طال انتظارها منذ عيد الأضحى الماضي
بس اللي حصل غير كده خالص اللي حصل أني شفت اسبوعين ما يعلم بيهم اللا ربنا حصلت جريمة سرقة في الصيدلية والمبلغ كبير فصاحب الصيدلية شاف إن ده كان بسبب تقصير من الشفت المسائي فخدني أنا و مدير الشفت وخد في سنانك وقرر إنه يمشي اتنين من الصيادلة و يخلينا انا وصاحبي نتحمل الفلوس اللي اتسرقت ومن يوميها والجو مشحون والشغل اللي كان بيشتغلو شتمانية بقا بيشتغلوا اربعة ماهو اتنين اترفدوا وواحد اتنقل الصبح وواحد مشي وبيقنا متقطعين
اللذيذ في الموضوع هو الروح اللب بقت موجوده كله شاكك في التاني وكله حاسس إنه ممكن يترفد في يوم وكالتعب زاد ومالمرتب قل - أو يمكن مابقاش موجود خالص حاجة جميلة جدا كل ده والأجازة الأسبوعية اتلغن عشان في هعجز في الدكاترة والكاشير مشي فبقى لازم حد يقعد مكانه ومين اللي يقعد طبعا ابو حظ حلو اللي هو انا ليه عشان يطلع عليه عجز سبعين جنية يتخصموا من المرتب هما رخرين ما هي ناقصة مع العلم إن انا امي مش مدخلاني صيدلىة عشان اقعد كاشير دا غير ان في ظروف جميلة زي دي الخناقة اللي بيني وبين صاحبي زادت مش هديت ووصلت لطريق مسدود

بجد حسبي الله ونعم الوكيل في الدنيا دي

انا قلت هستريح وهايبقى ندي قت اتفسح الصبح وهايبقالي اجازة اسبوعيه زي خلق الله.......... واديني دلوقتي بفكر إني أسيب الصيدلية خالص ما هو الواحد مالوش مزاج يجيني ضغط بدري

برضة لازم نقول الحمد لله

هانت بس الدنيا اختلفت تماما

2007-07-17T16:26:00.000-07:00

خلاص من أول الشهر اللي جاي هارجع إنسان طبيعي بشتغل وعندي وقت أعمل حاجات تانية
اينعم لسة ماقررتش ايه الحاجات التانية بس انا مش ناوي أقعدفي البيت الصبح أكيد....أكيد هلاقي حاجة
أعملها
وبعد رحلة عمل قصيرة استمرت عام واحد ......فعليا أنا اشتغلت من شهر سبتمبر اللي فات والشهرين اللي قبله كنت بهزر......أقدر أقول إني اتغيرت 180 درجة وصراحة للأسوأ والأسوأ جدا كمان.....الشغل اكل دماغي ووقتي وكل حاجة في حياتي......بس الأهم من كل ده إنه غير في السنة دي اتغيرت تسعة وتسعين في المية من أفكاري ...على أساس إن في واحد في المية مش فاكره ماتغيرش
بس الحق يقال إزي الآيه ما بتقول "أفمن أسس بنيانه على تقوى من الله ورضوان كمن أسس بنيانه على شفا جرف هار" أعاذنا الله وإياكم من نار جهنم .........بس على شان محدش مخه يوديه لبعيد أنا اقصد في التعامل مع الدنيا أنا كنت في حالي فاكر إن الدنيا 1+1=2
طلعت غير كده خالص فقعدت اتلطم واخبط ولازلت وسأظل حتى أموت

بجد هي سنة سنة واحد بس اتعلمت فيها اد اللي اتعلمته في الواحد وعشرين سنة اللي قبلها

اكتر حاجة اتعلمتها إن الناس 3 أنواع عظيم وناجح و هفأ
ممكن نعمل تشبيه في الموضوع ده يبقى ظريف

فرضنا إن كان في ناس عايزين يروحوا مشوار فالعظيم يقعد يتعب عشان يعرف الطريق ويضحي بوقته و مجهوده ويجي قبل النهاية بتلات أربع ثواني او حتي بعد ما يوصل بثانية ويودع...مش شرط يموت بس يخرج من الصورة... وييجي الناجح اللي فاهم الدنيا صح يهندس الطريق ويوضبه وياخد الشهرة والنجاح كله أو ممكن يرمي الفتات للعظيم اللي ضحى وتعب وباقي الناس هفأ كل اللي بيعملوا إنهم بيمشوا في الطريق

غالبا بعد فترة ....لأنهم هفا بيضلوا الطريق فيرجع يبقى فيه عظيم وناجح وهلم جرا

النظرية دي مطبقة في كل نواحي الحياة تقريبا واللي يحزن إن دايما العظيم بيتنسي إلا في حالات محدودة جدا ويبقى ذكر الناجح اللي أخد الموضوع على طبق من دهب(أو خلينا نديله حقه برضه تعب شوية....بس مايقارنش بالعظيم خالص) ويبقى هو العظيم وهو اللي مفيش منه

عشان كده اللي يفكر إنه ياخد موفق لازم يعرف إنه في الغالب هيبقى عظيم ....... يعني هيطلع عين اهله وفي الآخر هيتنسي وينسب فعله(أغلبيته) لغيره...... وإنه هيضحي بكل حاجه عشان موقفه ده.....وهو انا بأكد على الكلمة دي تاني هو مش هياخد حاجة خالص......وهنا تيجي دور النية لو كان بيعمل لله فكله بقيله وأما إن كان يعمل للشهرة أو نفسه يلاقي أي تقديرفسيموت كمدا بلا شك

أنا بقه كنت فاكر قبل كده إن العظيم والناجح واحد فقلت هاخد موقف و هاحاول أغير الكون بس صراحة وجهة نظري دلوقت اتغيرت كتير مش عشان منافق بس عشان أنا مش عايز اتبهدل ولو اتبهدلت أحب أشوف ثمرة تعبي في الآخر

البديل التاني إنك تبقى ناجح يعني يعرف بالبلدي تعرف تركب موجة التغيير امتى وتساعدها وهب هوب هتلاقي نفسك بقيت فوق......الناجحين بتوع زمان كان بيركبوا موجة التغيير بالسليقة لما يحسوا إن التغيير مطلوب ...يعني إيمان بأهمية ونوعية.... أو بيبقوا راكبينها أصلا ولما ييجي الوقت المناسب بيظهر لهم مواقف تخليهم ياخدوا الفوكس كله إنما المشكلة دلوقتي إن في خمسمائة واحد بيفكركويس منهم واحد بس موجته هتكسرالدنيا وساعتها هيظهر سعيد الحظ الناجح عشان كده بيقولوا إن النجاح إنك تبقى واقف في المكان المناسب في الوقت المناسب

بقول كلام غريب ولا ماشي لحد دلوقتي
يعني في ماتشات الأهلى بما إنه هو اللي مسيطر دلوقتي أكتر واحد بيتحرك بيبقى شوقي ......ده هو العظيم...وبعدين ييجي قرب المنطقة يديها لأبو تريكة ....اللي هو الناجح فأخينا يجيب جون والناس تغني أبو تريكة يا فنان مش شوقي يا فنان مع إن شوقي تعب أكتر.....الذكاء هنا بقى إن أبو تريكة مش ماشية معاه بركاوي لأ ده راح الأهلي ...ورا شوقي..يعني ورا واحد عظيم ومافضلش في الترسانه اللي مافيهاش عظما ولا راح الزمالك اللي تامر عبد الحميد مصاب دايما فيه......يعني أبو تريكة ركب موجة الأهلي صح فوصل لآخرها وبقى ريسها ........يبقى عشان تصدقوني إني أقولك إن الأهلي أخد شوقي قبل أبو تربكة بسنتين وفي السنتين دول علي مستواه جامد جدا وكان الأهلي ساعتها بيخسر من الزمالك بس الراجل بيحاول.....بس لما راح أبو تريكة كانت الأوضاع ابتدت تتصلح بس بوجوده اتصلحت اسرع ورغم إن أول ماتش ليه مع الومالك موت نفسه فيه وجاب جون بس اتغلبوا إلا انه عافر ومع بداية الموسم اللي وراها بقى الأهلي ما نراه الآن

أهو انا بقى عاجبني أبو تريكة واللي عملوا ابوتريكة أكتر من شوقي اللي هو دلوقتي في ظل أبو تريكة بس المشكله إني بدور على شوقي ولاقي خمسين أهلي ينفعوا مع إني متأكد إن الدوري بياخده واحد بس في النهاية

و أحيانا اقول ايه وانا هاوجع دماغي ليه خليني زي اسلام الشاطر.....اللي هو ركب الموجه متأخر بس أهو داس فيها وخلاص واهو بيأدي ....هم دول اللي انا قصدي عليهم بالهفأ ....دون قصد تجريح اللاعب فأنا معجب جدا بيه
بس الحق إنه ماراحش إلا بعد الأهلي ما بقا أهلي فإسمه مالمعش زي أبو تريكة بس أهو شغال يعني

أرجو أن تكونو فهمتهم قصدي
بس كده لسه هنشوف بقى ايه اللي هيحصل الأيام القليلة القادمة وهيتحدد هنبقى ايه

دعوة للهدوء

2007-05-29T12:52:00.000-07:00

فاكرين فيلم واحد من الناس طب فاكرين فيلم الزوجة التانية .........طب حد شاف وداعا شاوشنك أو أخيرا فيلم
the illusionist
عارفين ايه اللي بيجنع الأفلام دي كلها إنها كلها بتحكي عن بطل اتظلم وعايز حقه بس المميز في الأفلام دي واللي عاجبني فيها أوي هو سلوك البطل .........عاش في دور المغلوب على أمره وقعد يدق في أسافين من تحت لتحت لحد ما خلص الفيلم والظالم هو اللي يصعب عليك من اللي حصله
الموضوع ده شاغللي تفكيري أوي ينفع الإنسان يبقى وبينتقم في الدرا وهو عامل نفسه غلبان وينتصر في النهاية ......يمكن لدجة إنه يبقى ظالم في النهاية من غير ما يتعصب ولا يتنشن ولا يطقله عرق ؟؟؟؟لا ومن غير ماحد يلومه على اللي عمله كمان؟؟؟؟ هل دا ممكن يحصل في الحقيقة ولا كلام أفلام وبس

الحقيقة إني لقيت إن الأمثلة الواقعية على اللي عمل كده كتير أوي وأغلبيتها يشهد بنجاح تامللمظلوم أو المفترى عليه ........ وإن كان في حالات كتير قلب ظالم في النهايه.......المثال الأبرز بالطبع هو جارتنا العزيزة إسرائيل التي حولت مما تعرضات له من مجازر وانتهاكات للحقوق اليهودية في العالم إلى قضية عالمية و سرعان ما بدا الأمر بالذكاء والدهاء واللوبي والسيطرة على اقتصاد العالم يتحول إلى حق لليهود في بناء دولة لهم في مستعمرة برطانية حتى صار الوضع على مانحن عليه بل وبغت وظلمت في فلسطين ولا أحد يستطيع أن يتكلم من المعارضين لها لماذا لأنها صارت الآن الأوقوى وفي نفس الوقت في نظر العالم إلا القليل منهم المسكينة التي يتربص بها من حولها

وضع مشابه جدا للأفلام هو ماحدث الملك شارلز الأول ملك انجلترا الظالم على يد البيوريتانيين وعلى رأسهم كرومويل الناس لا عملوا أحزاب معارضة الناش مش فاهمة هي بتتكلم عن ايه ولا حاجة خالص دول قعدوا يتغلغلوا في الشعب لحد ماتعينوا في البرلمان واتحكموا فيه تماما و بعدين راحوا قبضوا على الملك و حاكموه بتهمة الخيانة العظمى و موتوا بالمقصلة في ميدان عام بعد ما أصبحوا المصيطرين علىالبلاد فعليا....... اينعم دا متمش من يوم وليلة دول قعدوا ييجي عشرين يسنة بس في الآخر الملك هو اللي كان بيحابهم بجيش جايبه من بره أما هم فكانوا مصيطرين على البلد كلها بس تاتا تاتا رغم إن الشعب نفسه ما صدقش نفسه لما لقى نفسه بقى من غير ملك واليوريتانني بيحطوا كرومويل حامي حمى (نفس اللي بيحصلك فيآخر الفيلم)بتندهش وتقول ااه يا ولاد الجنيه

طب ونروح بعيد ليه مااحنا عندنا النبي عليه الصلاة والسلام.........وهو أسوة لينا كلنا لما الناس اتظلمت في مكة واشتد التعذيب لا عمل مجموعات انتحارية ولا اتنرفز ولا حاجة فكرا و ربنا هداه لمجموعة من الشباب الصغير من المدينة آمنوا بيه وايدوه هاجرلهم و قواهم وقووه وبنوا بعض سنه سنه وماهمهمش إن قريش تمنعهم من دخول مكة للعمرة سنة صلح الحديبية بل وعملوا العهد والتزموا بيها لحد ما يوم فتح مكة ماكنش حد يستجري يقف قدام جيش المسلمين و لأ وكمان المسلمين على حق لأن الكفار خرقوا التفاقية ..............طبعا اللي يميز الإسلام إنه لما بيقدر بيعفي

محدش طبعا يفهم من كلامي إني بقارن بين قيام الدولة الإسلامية وإسرائيل ....أنا بس بتكلم عن ملمح مشترك وحيد يجمعهما إن الفئتين اتظلموا بس بتشغيل المخ والمجهود حولوا ظلمهم لمكسب غير متوقع لازم تعجب من ذكاء اللي خطط له
يبقى المهم لما الواحد يبقى مظلوم إنه ما يجعجعش ولا ييأس لا يشغل البطاطساية اللي فوق رقبته ويفكر في أفكار جديدة و ما يستسلمش لليأس مش عيب إن الواحد يلف ويدور ويتكتك ويتسهتن ويعمل غلبان العيب إن الدنيا تتاخد أفش

كل الأمثلة قلت عليها كانت أضعف بمراحل من اللي ظلموها بس في النهاية هدوء وتشغيل مخ وواقعية وبعد عن الشعارات و اليأس وما فيش مستحيل

يبقى لما تتظلم المرة اللي جايه في شغلك ولا في في أي حتى ماتولولش ولا تقدم شكوى ولا الحوارات دي كلها فكر فكر فكر لفها من هنا ومن هنا وقلبها خليك كهين واتقل على الرز الحل أكيد لافف مش خط مستقيم حاول يبقى عندك دهاء

بس بما إننا مسلمين برضه لازم أفكرك إنك تعفو لما تقدر

الفلوس ...... لختراع فاشل

2007-04-23T17:06:00.000-07:00

من وسط المعمعة وفي يوم سرقته خلسة من وسط الاسبوع الحافل ابو خمستاشر ساعة شغل في اليوم قولت اكتب قبل ما انسى ازاي الواحد بيكتب كلام غير ثلاث مرات قبل الاكل وقرص بعد العشا وله طرفنا خمسة جنيه والكلام اللي اتحفظ ده

الغريب اني مالقيتش حاجة اكتب عتها ما هو مفيش حاجة في دنيتي دلوقتي غير الشغل مفيش وقت عشان اعمل أي حاجة تانية . ااه والله مفيش حاجو تانية خالص بفكر فيها

قلت اخش باقي المدونات يمكن اسرق فكرة وللا حاجة تشدني ارد عليها......كل مااخش مدونة الاقيهم بيتكلموا عن واحد اسمهعبد المنعم اتقبض عليه........ وبما إني مغيب فانا معرفش مبن الأخ عبد المنعم اصلا فمينفعش اكتب عنه.........بس بما إنه راجل مصري ومسلم وحر واتحبس سبقى لا أملك له سوى الدعاء أن يفك الله أسره و ينصر أفكاره إن كانت صائبة و في مرضاة الله والوطن

بس فمالقتش حاجة اتكلم فيها إلا تعليق عل موضوع فلسفة المالعند ربة السيف والقلم فقلت افتكس أي كلام.......وها هو الافتكاس اللي مالوش أي لازمة غير فك الفضا

بجد احنا عاشين ليه....... علشان نعبد ربنا ونعمر الأرض ...............ده الرد الطبيعي اللي العاقل يقوله
طيب احنا بنشتغل ليه.........علشان النبي لما لقى واحد قاعد في المسجد لا ينفك عن العبادة سأل أيكم يكفيه طعامه وشرابه قالوله كلنا قاللهم كلكم خير منه وكمان عشان لازم نعمر الأرض عن طريق الشغل ما هي مش هتتعمر لوحدها

أما بناخد فلوس على الشغل ليه ما بنقضيهاش من غير فلوس ليه يعني اللي عايز حاجة من السوبر ماركت يقول لعمو عايز ده فيديهوله من غير فلوس...........ما هو عمو شاري السوبر ماركت من غير فلوس من صاحبة اللي باعه عشان عيي و بياخد الدوا من غير فلوس والحياة حلوة

طب بجد اخترعوا الفلوس ليه؟؟؟ رخامة وللا ليها سبب
زمان ايام الجمع والاتقاط كان الكل بياكل من أي شجرة وماحدش بيقول لحد لا دي بتاعتي ودي بتاعتك
بس لما الدنيا جفت والمطر قل الأكل بفى محدود ابتدت الخناقات فقالوا نقسمها قسمة العدل كل واحد ياخد شجرة تبقى بتاعته ومالوش دعوة بباقي الشجر عشان ماحدش يتظلم و بعد كده اتطبق الموضوع دا على عصر الرعي يعني ده بقرتك ودي بقرتي ودا جملي وده جملك وبعدين ابتدى ابو جمل يعوز البقرة فقاله نبدل البقرة بالجمل فوافق وتمت أول عملية مقايضة شوية وبقى لكل حاجة ثمنها أو قيمتها وبعدين قالوا نعمل حاجة وسط لو انا مش عايز حاجة دلوقتي بدل البضاعة اللي هابيعهالك فخلوها الاحجار الكريمة الأول وبعدين الذهب وبعدين الفلوس واخيرا البطاقة الائتمانية

بس نرجع مرجوعنا للأول يعني الفلوس اخترعت أصلا عشان محدش ياكل حق حد وكل واحد يبقى ليه ملكيته اللي تعب فيها و سهر الليالي و مايتساواش العاطل بالباطل
ياللعجب............دي الفلوس أصل الظلم
وعلى رأي المثل اللي مامعوش مايلزموش

بس المتمعن في النظر يلاقي إن نظرية الملكية أصلا قائمة على مبدأ المحدودية يعني لما بقت الحاجة محدودة بقى لازم نقسمها إنما لو الخير كتير ومش فارقه يبقى مفيش داعي لوجود فلوس أصلا يعني لو الخير اللي في الدنيا كتير ويساع كل اللي فيها وزيادة أوي يبقى لا داعي لوجود فلوس أصلا

بس ماهو المشكلة إن ساعتها هيطلع ناس طماعة أو على الأقل كثيرة الاستهلاك الواحد منهم ياكل السوبر ماركت كله في يوم واحد يكوشوا على الدنيا كلها و يكلوا نصيب ناس تانية بوضع اليد والرجل وساعتها يرجع الخير يقل قيبقى لازم يبقى فيه فلوس عشان الدنيا تبقى منظمة ومحدش ياكل حق حد

عشان كده المكان الوحيد اللي مافيهوش فلوس هو الجنة لأن الخير كتير أوي بزيادة فظيعة عن حاجة الموجودين فلو كل واحد خد حقة وزيادة مليون مرة برضه مش فارقة وعمر اللي قاعدين ما هيحسوا بأي نقص في الخيرات اللي موجودة

طب نرجع لموضوع تاني ...إذا كان الفوس غرضها هو حفظ الحقوق ليه كل حاجة ليها سعرها يعني ليه الواحد ماينفعشي كل حاجة تبقى بجنية وخلاص ليه الدهب ما يبقاش نفس تمن الألماظ زي التراب زي الحجر
السبب هو إن لاتراب مع الناس كلها وأي حد ممكن يحصل عليه إنما إنك تجيب الذهب صعب وعايز مجهود فقام الراجل اللي لقى الذهب قال وهو بيبيعو لبتاع الحجر أنا هديلك حته الذهب الصغيرة دي بعشرين بكل الحجر اللي عندك التاني قاللوا ليه كده ززقاللوا عشان تعبت فيه إنما انت لقيت الحجر في الشارع من غير مجهود (إنما لو في بلد تانية الحجارة فيها صعبة المنال والذهب موجود في الشارع هيبقى الوضع معكوس) وأسباب غلاء الحاجة ممكن يكون التعب في مجايبها أو إن شكلها حلو أو أو مليون سبب

يعني الفلوس في حد ذاتها حفظ لحق الإنسان في شراء خدمة أو سلعة بحقها وليست في حد ذاتها لا سلعة ولا خدمة يعني ممكن لو انت عندك مزرعة ورثتها عن ابوك تشتغل فيها وجيبلك أكل تاكل منه من غيرأي حاجة للفلوس أصلا
نظيرا دا صحيح

بعد شوية الفلوس قسمت الناس لفئات وبما إن كل فئة معاها فلوس معينه يبقى هتحصل على سلع وخدمات معينة جودتها مساوية للي معاها لا أكتر ولا أقل و الخدمات دي يخش فيها الصحة والتعليم يبقى دول غير دول ومن هنا بقى فيه مستويات اجتماعية مختلفة قائمة بنسبة تسعة وتسعين في المية على انت معاك فلوس اد ايه وممكن تدفع اد ايه وطلع نظام الطبقية وعيلتنا متتجوزش إلا من عيلة فلان وكلام من هذا القبيل

بس نرجع نقول تاني الفلوس معمولة ليه عشان تحفظ الحقوق من الضياع بس وكل حاجة على الأرض مش ملك حد بجد......إنما احنا اللي خليناها ملكيات خاصة وكل واحد بشطارنه و بتوفيق ربنا زود ملكيته

يبقى اللي بيتهافتوا على الفلوس إنما يتقاتلون على حاجة أولا مش بتاعتهم أصلا.......ثانيا مالهاش قيمة عشان كده وللا كده الأخرة مافيهاش فلوس ثالثا لو بتقول عاملها عشان اسيبها لعيالي أقولك ما انت عيالك دول لو اشتغلوا زي ما ربنا أراد كل واحد فيهم هيجيلو فلوس من غير ما حضرتك تموت نفسك عشان ورقة ممكن ما يبقاش ليها أي لازمة
خامسا في حديث للنبي عليه الصلاة والسلام بيقول

(من أصبح آمنا في سربه معافا في بدنه عنده قوت يومه فقد حيزت له الدنيا بخذافيرها) يعني لو عندك بيضتين مش يأكلوك وتعيش عليهم خلاص عايز ايه تاني هتاكل الفلوس يعني هي كل مافيها هتجيبلك أكل أحسن خلاص يا سيدي يا ترضى بالبيضتين يا تشتغل ساعة زيادة وانت هتجيب معاهم حته مربى

يللا أهو أي كلام الواحد كان نفسه يقوله لنفسه وقاله وخلاص

المهم يعني اللي بيقبض أكتر مش أحسن في حاجة لو مش راضي والأقل مش أسوأ في حاجة لو راضي وأهو كله هيموت ومش هتفرق مع حد الحوارات الفكسانه دي كلها يوم القيامة

ادعوا بس لاخواننا اللي مش لاقيين شغل يلاقوا شغل لأن هم دول اللي يصعبوا على الواحد بجد بالذات لما يبقى ابوه دخله جامعة خاصة وللا حاجة
يللا بقى سلام عليكم

مفيش كلام يتقال

2007-03-14T19:23:00.000-07:00

بجد والله مافيش كلام يتقال

طب اقول ايه

شوية كلام انشا عن حق الناس اللي ماتوا وللا الناس اللي ماتوا وللا القصاص ولا ولا ما هو كله قي الآخر مصيره الكابينيه

طب اقول كلام انشا من عينة احنا لازم نبقى اقوى منهم ونشتغل ونتعب لحد مانقدر ناخد حقنا......................طب ما طوب الارض عارف كده ومع ذلك ولا حد بيتنيل يشتغل عدل

نبعت رسالة بعت بس هتعمل ايه نمضي على بيتيشن مضينا بس فين الإجابية في دوستين تك تك

قصر الكلام اللي مالوش ضهر ينضرب على بطنه واللي ما يقدرش يصرف العفريت يتحمل اذاه وكيس

الجوافة عمره ما هيتحرك من مكانه

واللي يقدر يعمل حاجة يعملها واللي مايقدرش يسكت ومايجعجعش ويبلع جزمة قديمة لحد ما يقدر

واهي الحادثة دي وقعت ايام عبد الناصر ولا جعجعته قبلها تفعت ولا خوفت حد وبدل ما نرميهم في البحر رمونا في المدافن

ربنا يسامحنا بقى.................والله مكسوف وانا بكتبها بس أهو الحديث القدسي بيقول (إن رحمتي سبقت عدلي)وهو ده الأمل

ربنا يرحمهم ويغفرلهم ......ويغفرلنا و يسامحنا ويهدينا للصح بقى لحسن دا كده بقى صعب اوي

شيكاجو

2007-02-17T18:46:00.000-08:00

اخيرا....وبعد ما تقريبا كنت نسيت القراءة من شهر 11 السنة اللي فاتت....رجعت اقرا تاني...ولأني كان عندي حاجة كده زي العطش للقراءة لقيت نفسي مسكت القصة الجديدة بتاعة علاء الأسواني وقريتها كلها مرة واحد وما أخدتشي في إيدي غير 4 ساعات ماحسيتش فيهم بأي نوع من الزهق ....باستثناء النداء المتكرر لماما...ماتقفل النور وتنام بقى وأنا رد نفس الرد ...يا ماما بكره أجازة....الشهادة لله ماما ما نامتش إلا بعد ما أنا نمت

المهم إن أنا دايما بحب احكي فهحكيلكوا الرواية

الرواية نفسها اللي تشبه إلى حد كبير جدا عمارة يعقوبيان في طريقة السرد .....أكتر من شخصية رئيسية كل واحدة ليها حكاية بيتقاطعوا مع بعض لأن في حاجة واحدة بتجمعهم اللي هي كانت العمارة في الرواية اللي فاتت المرة دي الحاجة المشتركة هي مدينة شيكاجو الأمريكية ...الحكاية بتدور ببساطة حول اربعة طلاب مصريين يذهبوا إلى أمريكا لنيل درجات علمية من كلية الطب جامعو الينوي اللي هي أكبر كلية طب في العالم .وبجانب الطلاب الأربع هناك أربع شخصيات أخرى رئيسية وهم أستاذين مصريين في نفس القسم وطبيب من أقباط المهجر و أستاذ أمريكي في نفس القسم. فما هي حكايتهم ؟

أولهم أحمد دنانة معيد في كلية طب القاهرة ...منوفي..أمنجي...ليس عالما وإنما تعين بضغط من أمن الدولة مشترك في الحزب الحاكم وهو من كبار المافقين يسافر ليكون عينا للأمن على الطلاب هناك ويعين رئيسا لطلاب المنح هناك..مهمته أن يخدمهم وهو في الحقيقة يمتهنهم ويذلهم ففي يده أن يرسل تقرير عن أي منهم إلى المخابرات يقطع منحته ويعيده إلى مصر....... وهو في الوقت نفسه يتحين الفرص ليعلة في الحزب ولم لا يكون وزيرا ومن هنا ينشإ صداقات مع أفراد القنصلية ويتزوج من ابنة تاجر كبير ليجمع بين المال والنفوذ وتأتية الفرصة الذهبية حين يأتي الرئيس لشيكاجو

ثانيهم ناجي عبد الصمد الثورجي الاشتراكي المدمن للنبيذ الذي فقد تعيينه المستحق في كلية الطب بسبب سقوطه في كشف الهيئة بتاعة المعيدين بسبب تقارير ناس طيبة زي أحمد دنانة يسافر دون منح من الكلية إنما بمنحة من الكلية الأمريكية لتفوقه رغم أنه مسافر بالأساس لا للعلم ولكن لتكون درجته ورقة تثبت حقة في قضيتة التي رفعها على الجامعة لتعيينه وهناك تتربص به عيون المخابرات باعتباره شخص مثير للمشاكل خاصة وهو يحضر لبيان يلقية أما الرئيس في زيارته للتنديد يه ومطالبته بالتنحي

الثالث هو طارق حسيب....الحريت الذي لا يفكر سوى في المذاكرة ووقت الفراغ يقضيه بين المصارعة والبسبوسة والسيديهات نابغة ولكنه غريب الطوار انطوائي سافر ليثبت لأبيه انه عرف يربي.معتز بنفسه جدا ويظن انه ماجابتوش ولاده.....مالوش في السياسة ولاوجع القلب كل ما يفكر فيه هو نفسه فقط حتي يجد نفسه متورط في علاقة عاطفيه هدفه منها الأخذ فقط ولكن الأمور تسير بغير ما يريد

الرابعة هي شيماء محمدي المعيدة المجتهدة المتدينة التي تربت على الأخلاق والتدين في بلدتها الريفية ولكنها شيئا فشيئا أخذت تذبل فالعريس لا يوجد وفقط أولئك المتبرجات يحصلن على الحب والعرسان أما هي فأخلاقها لم تفدها سوي في سمعة براقة....تسافر رغم اعتراض أهلها لكي تنسى همومها وتحاول أن تبدأ من جديد بعيد عن أحزان العريس الغائب الذي تجده هناك و تقيدله صوابعها العشرة شمع عشان يتجوزها وهو مش سائل

أما الأساتذة فهم محمد صلاح استاذ الطب الذي هاجر من مصر قبل حرب اكتوبر ليأسة من تحسن الأوضاع هناك فقرر أن يعيش الحلم الأمريكي فتزوج أمركية وتجنس ولكنه يجد نفسه يشعر بالوحدة وعدم النتماء للبلد الجديد ويسعى لأي شئ من ريحة مصر يذكره بحبيبتة الثورية التي تركها لتعتقل وهرب هو إلى أمريكا وحتى يثبت لنفسه انه مش جبان يقرر قراءة البيان المحظور

و رأفت الذي أممت الثورة ممتكات ابيه الباشا فقرر أن يتنازل عن بلده وسافر وتجنس ولكنه يكره مصر وكل ما فيها بل ويكره المصريين جميعا فقد اعتبر نفسه منذ سافر أمريكيا في كل شئ حتى بنته رباها على التقاليد الأمريكية حتى صار لها بوي فرند وعادي خالص بل وهو لا يستخدم العربية إطلاقا حتى مع العرب حين يحدثهم ولكن ابنته تدخل عالم المراهقين الأمريكيين فتدمن فيشعر للمرة الأولي بعدم حبه لأمريكا وكرهه للحياة هناك

والطبيب القبطي كرم دوس الذي كان على وشك نيل الدكتوراه من مصر ولكن استاذه كان يفشله لأنه يظن أن مثل هذا القبطي لا أمان له في الجراحات الدقيقة للمسلمين!!!!! فيسافر وقد تحول هذا الموقف إلى احساس بالضطهاد الديني مما يبعثه على التفوق في أمريكا ليثبت للجميع أن مصر هي التي خسرته حتى يصير من أشهر الأطباء رغم أنه يعاني هناك من نظرة الأمريكان له كعربي ملون يعني مواطن درجة تانية فيشعر أن الأمرين سيان ولكنه رغم ذلك لا يلقى أي ترحيب بأي عودة يتمناها لمصر فيصير من أقباط المهجر المتربصين بالحكومة المصرية ويساعد ناجي

و الأخير هو دكتور جراهام الذي يمثل مشاكل أمريكا نفسها فهو من جيل فيتنام الذي ثار من أجل اسقاط الرأس مالية المتسلطة في أمريكا ولكن رفاقه سقطوا واحدا تلو الأخر حتى صارت تلك السياسات الأمريكية تحاصرة من كل اتجاه حتى حياته الشخصية مع عشيقته

التفاصيلوالأحداث كتيرة فاقروا انتوا الرواية بقى

بس أنا لي كام تعليق كده

أولا طول القصة تلاقي في فكرة أساسية الراجل عايز يقولها وهي إن في مصر كل التدين ده مصطنع لدرجة إن

الست زينب خطيبة دكتور صلاح بتكلموا تقولوا تصور إن الفكر الأصولي وصل لنا لدرجة إن أنا الوحيدة اللي مش محجبة في المكان اللي بشتغل فيه - كما لو كان الحجاب يدل على التخلف-في نفس الوقت الذي لا يرى الكاتب أي مشكلة إن سي ناجي يسكر طول اليوم ويدخل في علاقة عاطفية غير بريئة خالص مع واحدة يهودية-وكأن ده العادي واللي مفروض يحصل وبلاش كلاكيع

ثانيا أنا مافخمتش هو عايز يقول ايه من ورا حكاية شيماء وطارق هل قصده إن الأفكار القديمة زي العفة بقت موضة قديمة وإن كان مفروض انهم يعيشوا مع بعض من الأول قصة حب من غير القيود اللي كانوا حطينها على نفسهم .....اللي نفسي اعرفه بجد ايه المغزي من وجود طارق في غرفة العمليات مع شيماء هل هيصلح غاطته وللا

هو عايز يفهمنا إن مفيش غلطة أصلا وللا ايه بالضبط

ثالثا أنا معجب جدا بالجرأة في الحته بتاعة الريس انه هاجمه شخصيا لأنها جت منطقية وواقعية جدا جدا

رابعا برغم النهاية المأساوية لمعظم القصص زي عمارة يعقوبيان إلا إني شخصية ماقدرتش اتعاطف مع بوهيمية

د.جراهام فماصعبش عليا خالص اللي صعب عليا بجد د صلاح ود رأفت لأن دول مثال لملايين في مصر وفعلا هي دي النهاية المنطقية ليهم.....وعجبني جدا تصرف مراة احمد أخر القصة ولة إن ده ما أثرش فيه

أخيرا رغم جمال قصة إلا إن كمية الإباحية والألفاظ الجنسية كتير بزياده وبعدين مش تلميح لا دا كده خبط لزق أكنه عايز يزود للناس الثقافة الجنسية يعني في عمارة يعقوبيان قعد يسهب في ألفاظ الشواذ و كروديا ومش كروديا والمرة دي كان في جزء مالوش لزمة إنه يبقى بكل التفاصيل دي عن الفيبراتور والجي سبوت والكلام ده.......برضة الحياء مطلوب

i have been tagged

2007-02-11T06:34:00.000-08:00

thanks ma3lena for the tag:
well the tag is for 5 things no one know about me:

1- The best book i read was (the story of religions) by soliman mazhar an egytian scholar tracking the beging and basic concepts of every religion on earth
2- I never put perfumes coz they irritate me
3- Although i'm now short (165 cm) i was the tallest in my class untill my growth stopped at 3rd preparatory school year :-(
4- one of my dreams is to travel abroad..........not to any country......only switzerland.
5- according to Myra's test of personality, my type is INTP

حينما تكون المصائب أجمل ما يقع للإنسان

2007-02-03T17:53:00.000-08:00

قديما قالوا أن الحاجة أم الاختراع
وقديما جاء الإسلام الينا في ظروف حالكة حتى إذا ما تحسنت الأوضاع أيام ذو النورين - رضي الله عنه رغم أي أنف حقير- بدأ المسير الى الهاوية
وقديما قال نوح (رب لاتذر على الأرض من الكافرين ديارا)فلما تحقق دعاؤه لم يزد ذلك الأرض إلا تحول أبناء المؤمنين إلى الكفر.
وقديما جاء ابو حنيفة و الشافعي وابن حنبل في أيام الانقلابات العسكرية والدسائس بين الأمين والمأمون وفتنة خلق القرآن
وقديما جاء رواة الحديث البخاري ومسلم والنسائي وابو داوود و البيهقي في وقت انهيار الدولة العباسية الأولى
وقديما جاء العز بن عبد السلام و ابن تيمية وابن القيم في عصر التتار حيث القتل بالآلاف والجرحى بالملاييين والفتنة على أشدها
وقديما ظهر صلاح الدين ليحرر القدس وظهر يوسف ابن تاشفين ليعيد الأندلس من أيدي الفونس السادس وجاء قطز ليهزم التتار
وحديثا..... لم ينتصر المصريون منذ ايام محمد على إلا في 1973 حين كان اليقين في الهزيمة بعد اقسي هزيمة لمصر في تاريخها في 1967 وحديثا تستنزف العراق ....المستنزفة أصلا قوات أمريكا التي لم تجد صعوبة في دخول العراق في ثلاثة أسابيع .................حتى أمريكا التي تملا الدنيا بجبروتها لم يطلقها على العالم إلا مأساة بيرل هاربر التي راح ضحيتها الاف الجنود الأمريكان في عرض البحر ثم لم يقم ثورتها الجديدة إلا مصرع الآلاف من أبنائها في 11 سبتمبر ....مع الفارق ولكن هذه نقطة أخرى

يقولون أن الشاعر إذا لم يشعر بالحزن ويقع تحت تجربة مريرة لا يخرج شعره صادقا و أن العالم مالم يقض أوقاتا مضنية مع تجارب فاشلة لا لنجح في اختراعة وأنا أضيف – لو سمحتولي – وأن الإنسان لا يصبح إنسانا إلا في الشدة أما في غيرها فالناس سواسية

شاهدت من يومين فيلم ملكة جمال صن شاين الصغيرة أو little miss sunshine
وتوقفت أمام ديالوج رائع جدا جدا بين ابن صدم من الفشل حين اكتشف أن لديه عمى ألوان يمنعه من دخول أكاديمية الطيران وعمه
الابن : اتمنى لو أنام فاستيقذ لأجد نفسي وقد بلغت 18 عاما وقد انتهت سنوات الدراسة
الخال: اتعرف مارسيل بروست
الابن :اجل لقد كنا ندرسه
الخال: كاتب فرنسي فاشل كليا لم يحظ يوما بوظيفة شاذ له غراميات كثيرة غير متبادلة .....و امضى 20 عاما من حياته يؤلف لكتابا لم يقرؤه أحد..............ولكنه الآن ربما مثل شيكسبير...............على أيه حال هذا الرجل في نهاية حياته نظر ورائه واكتشف أن كل تلك السنوات التعيسة التي مضت كانت أسعد لحظات حياته لأنها هي التي صنعت شخصيته ......أما عن سنوات سعادته فيما بعد فكلها أيام مهدرة لم يتعلم منها شئ
لذلك لو نمت حتى ال18 فكر في المعانة التي ستفوتها....إنها سنوات المعاناة القصوي لشاب مثلك المذاكرة والامتحانات
الابن: تبا لمسابقات ملكات الجمال.......الحياة مجرد مسابقات ملكات جمال الواحدة تلو الأخرى
تبا لأكاديمية القوات الجوية لو أردت الطيران سأجد طريقة لذلك.

فعلا إن التخبط والفشل الذين نعاني منهم الآن في مصر هم فرصة لنا علينا أن نحمد الله عليها إنها الفرصة لكي يعلو من يعلو ويهبط من يهبط إن المحن هي مصنع الرجال وليس العلم والمعرفة فعلم الاف السنين لا يوازي تجربة واحدة مريرة

إنني أدعو الناس للنفاؤل ليس لأان الغد أجمل لا .......و ليست الفكرة في أن يكون جميلا أصلا ولكن للتفاؤل في غد نكون فيه أكثر خبرة بعد الأزمات التي نعبرها الآن ويكون جيلنا هو الآخذ بزمام الأمور ونتعرض وقتها للشدائد ونتصدي لها ونحاول أن نأتي بعصر عزة وسعادة.....أما أن يأتي أولا يأتي فليس تلك المشكلة لأن الدائرة ستدور من جديد.

هل تعلمون ما هو أفضل عصور المسلمين لقد كان عصر عمر ...لماذا لأن عمر تولى وقد كان الناس كارهة لحكمه لشهرته بالبطش ثم أنه تولي البلاد والجيش يوشك أن يلتحم مع الروم الطامحين في إزالة الامبراطورية الوليدة في اليرموك وبعد انتهاء المعركة بالنصر وفتح الشام ومن بعدها بيت المقدس كانت هناك معركة أخري في الشرق مع رستم الذي جهز جيوشة للانقضاض على الجزيرة وما ان انتهت تلك الحرب حتى هرب الفرس إلى ايران وبدأو اعادة قوتهم فذهب الجيش لينتصر عليهم في نهاوند ويفرق شملهم ليأتي ليجد بركانا قد تفجر حول المدينة ومجاعة قاتلة تحيط بالناس و امير المؤمنين نفسه لا يجد طعاما يكفيه وفي خضم هذا يبدأ جفاف الأرض و ينقطع المطر وتبدا الحالة الاقتصادية في الانهيار ومع ذلك تجهز الجيوش لفتح مصر والتي يبعث إليها الروم بخيرة جيوشهم فتظل الاسكندرية محاصرة لفترة طويلة وفي النهايه تفتح الاسكندرية بابها ويخل عمرو بن العاص مصر فاتحا ويأتي المدد إلى الخليفة من خيرات مصر لا يلبث أن يبدأ إفساد بعض الولاة أن يبدأ فيقيم عمر نظمه الإدارية والقانونية لمحاسبة الولاة حتى إذا ما هدأت الحياة واستراحت النفوس قليلا من كل تلك المصاعب المتتالية مات عمر مسموما على يد ابي لؤلؤة المجوسي عليه لعنة الله. وهكذا تنتهى القصة نهاية تعيسة تكون بداية لقصص آخري وهكذا

فالشاهد هنا أن عصر عمر ليس كما يبدو لبعض الناس عصر فتوح وتنعم وسلطان وووووو بل عصر أزمات صنعت أبطالا .................. وهكذا الأزمات دائما تنضح عما في النفوس فإما رجال وأبطالا وإما جبناء أما الحياة الهانئة الرغدة فهي تساوي بين الجميع وتنزل بالجميع الى هاوية سحيقة من الخمول لا يفوقون منها إلا بأزمة أخرى لتبدأ الحكاية من جديد
وصدق الله العظيم إذ يقول (أحسب الناس أن يتركوا أن يقولوا آمنا وهم لا يفتنون)
ويقول ( أم حسبتم أن تدخلوا الجنة ولما يأتكم مثل الذين خلوا من قبلكم مستهم البأساء والضراء وزلزلوا حتى يقول الرسول والذين آمنوا معه متى نصر الله إلا إن نصر الله قريب)
وأنا كنت أظن حتى فترة قريبا أن الابتلاء شئ سئ فإذا به أفضل ما يحدث للإنسان بل هو ما يجعله إنسانا متفوقا بتجاربة وآلامه و خبراته وقادرا على تحسين وضعه حتى يأتيه اختبار آخر ومعاناة أخرى تعلي من شأنه وهكذا

اللهم الهمنا الحق في مواجهة أزماتنا

من ليبيا إلى انكل: لو لم أكن مصريا لوددت أن اكون اي حاجة تانية انشالله صومالي

2007-01-27T18:34:00.000-08:00

قال ايه فريق الخماسي رايح يلعب مع نظيرة الليبي يخلص الشوط الأول ومصر كسبانه يقوم البلطجية بتوع ليبيا داخلين غرف اللاعيبة المصريين وهاتك يا ضرب لحد ما قفالوا يا كفى.......طبعا لاعبي مصر راحوا المستشفى ومانزلوش الشوط التاني .......يقوم الحكم النزية يحسب الماتش انسحاب و ليبيا كسبت..... المشكلة إن المسئولين يقولوا مش قضية دا لعب عيال ومش هيأثر على علاقتنا مع الأخوة.........طب يعتذروا أو الاتحاد الليبي يشطب اللاعيبة دي أو السفارة تقدم محضر .... اي حاجة تحفظ كرامة المصري........لالالا دي كلها ترهات و افعال صبيانية مش هتمس علاقتنا....و حد قاللك إن احنا عايزنها تمس احنا بس عايزين الغلطان يتعاقب والمظلوم تتردله كرامته ......لالا دا كلام قديم واحنا مش في زمن الشعارات.........مش عارف ليه أول ما سمعت الميس ده افتكرت الحوار اللي الرئيس عمله مع عماد أديب لما كان بيسأله عن تبعات محاولة قتله لما قال ....طبعا انا كنت ممكن اامر الجيش بدخول السودان لأان منفذي العملية سودانيين بس انا قلت هندخل ولادنا ليه في حرب ونوقف عجلة التنمية فتخليت عن الفكرة دي (وكان مفروض ساعتها اننا نعجب بيه )بقى عشان كرامة الريس ممكن حرب تقوم انما كرامة الشعب طظ فيها عامة ماهو ياما اتغاضينا قبل كده عن حقوق الضباط في سينا لما كانت اسرائيل بتموتهم خطأ........يللا ربنا يوفقني ولاقي سفرية بره وناخدلنا جنسية بلد تحترم المواطنين (للعلم فإن هناك قضية رفعها مصريون ضد جريدة الدستور بتهمة اعتداءءها بالسب والسخرية من العقيد القذافي )وحسبي الله ونعم الوكيل في نفس الوقت الذي عاد فيه اللاعبون

طبعا أنا مش بنادي إننا نحارب ليبيا بس بطالب إننا نطالب باعتذار رسمي و بشطب اللاعبين

وبالمناسبة....انا كنت قاعد مع خالتي وزوجها بنتكلم في السياسة وعن الفساد في مصر فكان له رأي غريب جدا .(ماحنا نقول لأمريكا تيجي تحتلنا وهم هيضبطوا البلد واستدل على هذا بأدلة مقنعة )أولا أنه لما سلم الألمان واليابانيين والكوريون أنفسهم لأمريكا ساعدتهم على التطور والعمران في حين أن فيتنام وكوريا الشمالية وكوبا رغم صوتهم العالي إلا أنها دول متخلفة لا ينعم المواطن فيها بما ينعم به مثيله في الدول التي استسلمت.....ثانيها هو أن بريطانيا حين خرجت من مصر كانت تدين لمصر بأكثر من 200 مليون دولار (يعني مصر كانت دولة دائنة )أما الآن فنحن دولة مدينة بالمليارارت يعني الاحتلال ماسرقناش أو على الأقل ماسرقناش زي ماناس تانية سرقتنا بعد كده وثالثها أنه من لا يسلم في البداية بشروط سهلة يسلم في النهاية بشروط مذلة ضاربا المثال بإسرائيل التي كانت تتمنى أن تعطي عرفات الضفة وغزة ويعترف بها هو في 1977 أما الأن فالفلسطينيون صاروا يتمنون أن يستطيعوا أن يحصلوا على نصف هذه الأرض وإسرائيل ترفض .........الكارثة كانت ما قاله احد الحاضرين له حين قال (المشكلة مش أمريكا المشكلة فينا احنا احنا اللي مش هنعرف نسغل وجودهم في تطويرنا وهنقعد نتخانق مع بعض زي العراق وفي الآخر هيسرقونا لما يلاقوا مافيناش أمل ويمشوا)ولا تعليق

حبه فرفشة

2007-01-15T18:58:00.001-08:00

من يومين قلت ادلع نفسي شوية واعمل اي حاجة مالهاش لزمة كده اعمل بيها رفرشمنت قمت دخلت على النت وانا ببص على بعض مواقع الأفلام الأجنبية لقيتهم عاملين سرد لأهم العبارات اللي اتقالت في الأفلام وعلقت مع الناش وانتشرت جدا .............. فلقيت ان احنا كمان عندنا عبارات ياما اتقالت في افلام
وعلقت فينا ...........ما هو احنا ماعلقتش معان اعبارات اللي اتقالت في افلام اجنبي لاننا كنا بنقرا الترجمة والترجمة نادرا مابتكون بحلاوة الأصل

ودي بعض العبارات اللي علقت واي حد عايز يضيف عبارة يحطها
1- جواز عتريس من فؤادة باطل -فيلم شئ من الخوف
2- وين هنادي ياماي - فيلم دعاء الكروان
3- روح العب مع الأسد يا أشرف - فيلم غريب في بيتي
4- اه يا خوفي منك يا بدران - فيلم امير النتقام
5- انا مش شايف غير صفين لولي - فيلم رصاصة في القلب
6- عشان كنا رجاله ووقفنا وقفة رجالة - فيلم الأرض
7- ليه هو ابوها رئيس مراجيح مولد النبي - صعيدي في الجامعة الامريكية
الفيلم ده فيه حتة تانية بتاعة قلتلك حريم لا يا علي متأمنش لست لغير لامك ولو ابوك طلقها متأمنلهاش

8- انا راجل وعمر كلمتي ماتنزل الأرض ابدا.......خلاص هتنزل المرة دي - فيلم ابن حميدو
9- العلبة دي فيها ايه.......العلبة دي فيها فيل - فيلم سر طاقية الإخفاء
10- عودي يا هاميس اتون يناديكي - فيلم عروس النيل
11- في أوروبا والدول المتقدمة بياكلوا مع الكباب طحينة - فيلم الإرهاب والكباب
12- هو كله ضرب ضرب مفيش شتيمة - فيلم الناظر
13- الفيلم ده قصة ولا مناظر - فيلم المنسي
14- كتاكيتو بني - زينات صدقي بس مش فاكر في فيلم ايه غالبا شارع الحب
15- انت كلت المتوفي........دي منبى يا معلمي منبى- فيلم حماتي ملاك
الفيلم ده كمان فيه حتة تانية : اسأليني أنا أمك مدوباهم اتنين

16- انا بابا ياد- فيلم تيتو
17- انت مش ابني طاخ (قلم) -فيلم الخطايا
18- اهي ردحت بالبلدي بنت سلطح بلطح- فيلم إشاعة حب
19 - قتلتا قتيل......ياللهول- فيلم غزل البنات
20-احمد منى -فيلم اقوى من الأيام
21-جهاد انتي فين يا جهاد -فيلم واإسلاماه
22-نشنت يا فالح -استيفن روستي بس مش عارف في فيلم ايه
23- الليلة الليلة ياعمده- فيلم الزوجة التانية
24- هو بعينة بغباوتة وشكله العكر- فيلم اسماعيل ياسين في الأسطول
25- الساعة بخمسة جنيه والحسابة بتحسب- فيلم عنتر شايل سيفه
26- الدواء فيه سم قاتل- هو فيلم مشهور بس مش عارف اسمه ايه
27- بحبك يا ستموني مهما الناس لاموني- فيلم الكيف
28- وباعدين يا عديلة بالطريقة دي العتبة هتضيع من ايدينا- فيلم العتبة الخضرا
29- ياريتني كنت معاهم- فيلم الطريق إلى ايلات
30- معلش يا سي السيد اصل السوارس صدمتني-فيلم بين القصرين
دول اللي انا فاكرهم دلوقتي واكيد فيه الاف غيرهم اللي يفتكر حاجة بقى يبقى يضيفها.......اهو نوع من التسلية

نظرة الى الدنيا

2007-01-08T18:21:00.000-08:00

أولا عزائي الحار إلي كل من حلم بحزب الوسط أو الكرامة أو أيا من الأحزاب المرفوضة الأخرى. هكذا هي مصرنا الحالية تقتل الأحلام ومحولات الإصلاح ليبقى الحال على ما هو عليه. ولكن لا تيأسوا ثمة فرصة مادام في العمر بقية إذا ثمة فرصة ربما غدا ربما بعد غد ولكن الحلم لا يموت

بس لجل الحق اللي حصل ده كان متوقع جدا ربما عكسه كان سيكون مفاجأة كبيرة بس ده طبيعي أوي مش عشان احنا في دولة لا مؤاخذه ...لا عشان دي سنة الحياة عمرها ما كانت بمبي ولا عمرها هتبقى بمبي و الفترات البمبية دي بتيجي كده تخاطيف في عمر الإنسانية يعني احسب كده فترة الخلفاء الراشدين اد أي من عمر الدولة الاسلامية ولا أي دولة تانية في الدنيا احسبلها فترة العزة (للشعب والدولة معا) هتلاقيه حاجة لا تذكر وسط تاريخ الحروب و الحكام الظالمين و الثورات الفاسدة و القلاقل وووووووو يعني الطبيعي في الدنيا انها تبقى بايظة وما بتتعدلش غير فترات صغيرة اوي وبعدين ترجع تقلب تاني يعني كان مفروض المثل يقول دولة الحق ساعة ودولة الظلم الي قيام الساعة وليس العكس..............والله ده ما تشاؤم بس دي بجد حقيقة الدنيا ناس يحاولوا يصلحوا وناس تقاومهم لفترات طويلة ولما ينجحوا ....مفيش يومين ويا يتقلبوا اسوأ ممن سبقهم أو تحدث الثورات والقلاقل فما تلبث الكرة ان تتكرر بس الوضع الطبيعي هو إن الدنيا وحشة وفي ناس بيحاولوا يصلحوا وبيتحربوا ........................ماهو لو كان الأصل إن الدنيا كويسة كانت ماتبقاش دنيا كانت تبقى جنة ...........فعلا الدنيا دار شقاء ده العادي بتاعها يعني اللي احنا عايشينة ده ربما يكون احد افضل الفترات يعني احنا لابنحارب ولا فيه تتار ولا صليبيين ....اينعم فيه أمريكان بس ما هو لازم يكون في الدنيا حد مفتري ده الواقع اللي مامنوش مفر واللي لازم نغيره وعلبال مانغيره ياإما هيكون فيه مفتري جديدد أو هنكون احنا اللي بقينا مفتريين ...ما هي هي الدنيا كده........................(ده كل ده على افتراض اننا كويسين اصلا دلوقتي )

وكفايه نكد بقى عليكو كده

بالحق انا لا كنت تبع الوسط ولا الكرامة ولا تبع أي حزب عشان مش مقتنع بالاحزاب اصلا وانها ممكن يبقى ليها دور .....انما ليه بقى خليلها موضوع تاني لوحده

كل سنة وانتو طيبين

2006-12-31T17:55:00.000-08:00

أولا كل سنة وكل الناس طيبة بمناسبة العيد ....اللي ماخدتش فيه غير يوم واحد اجازة.......وثانية بمناسبة راس السنة الجديدة اللي السنة دي بالذات دونا عن كل السنين باحتفل بيه.........اخيرا خلصت 2006 دي داحاجة خنقا ياجدع فين ايام 2005 وللا 2004 لالالالا 2004 دي ماكانتش قد كده بس هي اللي كانت جامده صراحة2005

صراحة 2006ماكنتش بالنسبة لي سنة عادية .............لا دي زيها 1984وزي 2001 واهم بكتير(يعني انا اتولدت 84 بس ماعملتش أي مجهود ساعتها و دخلت الكلية 2001 وده تاريخ مهم بس خرجت منها..وياريتني ماخرجت 2006) و هافضل طول عمري خريج 2006 فاكر السنة دي بكل حذافيرها من أول امتحان السيوتيكال اللي ماكنتش مذاكر نصه لحد العيد الكبير اللي نزلت الصيدلية تلات ايام منه وخدت يوم واحد اجازة

2006 مشكلتها الأساسية انها كانتسنة الواقع .........الارتطام والاصطدام بالواقع انا كنت في الكلية باخد مصروفي من ابويا وعايش ميت فل وماباخدش دروس عشان ماتقلش عليه .......... وبتفسح زي مانا عايز واذاكر وقت مانا عايز..........اينعم مكنتش مرفه نفسي أوي بس كانت كل حاجة عايزها باجيبها ولو بعد حين. كنت مع كده بحب اعمل انشطة وبحب اعمل حاجات مفيدة للبلد(ماعلينا من الحته دي عشان ماعيش في دور مصطفى كامل)بس القصد اني ماكنتش بني ادم تافه والحمد لله

بس مره واحده يوم 31-6-2006 لقيت نفسي ماعنديش كلية ...خلصت خلاص ...... يبقى لازم اعمل ايه لازم اشتغل واخلص ورق الجيش واخلص ورق التلكيف و اخلص كارنيه مزاولة المهنة وابتدي احوش عشان لو عايز اتجوز كان في دماغي إن الحياة بمبي ....إلا ان اصطدمت بالواقع ...كل حاجة عشان تتعمل بتاخد شهر وكل شوية يطلعلك موظف حمار يبوظلك الدنيا في الورق وبعدين بالليل تلاقي زبون حمار في الصيدلية تبقى عايز تولع في هدومك..........بس عدت السنة واخدنا الإعفا (بالمناسبة اخلص دعواتي لجميع الإخوة اللي داخلين الجيش وربنا معاهم بجد) وطلعنا الكارنيه وعملت الرخصة واشتغلت في صيدليتين دفعة واحدة ................كل ده حلو بس في حاجة ناقصة....... والله ما بطر على النعمة الحمد لله في ناس مش لاقيين النعمة اللي انا فيها بس ايام الكلية كنت ببقى نايم عارف اننا بكرة في الكلية وبعده فيها ولغاية ماخلصها عارف انا رايح فين وجاي منين انما بعد الكلية الواحد مابقاش عارف حاجة الله اعلم السنة اللي جاية هاشتغل وللا هاترفد وللا هسافر وللا هاحوش وللا التحويش كله هيضيع...........الواحد فضل طول عمره reacting واول مرة يقلب يبقى acting بتبقى صعبه خاصة في بلد زي مصر حالتها بالبلا والواحد عايز يحوش ويتجوز ويحج ويفتح مشروع يجيبله دخل يلاقي نفسه بيشتغل حوالي 12 ساعة يوميا بافضل شهادة فيكي يامصر وفي الاخر المرتب يبقى متواضع جدا يكفى النفقات بالكادو ما ينفش يتحوش منه..............دا غيرإن شغل 12 ساعة يوميا بما فيها الجمعة حارمك من مناسبات اجتماعية كتيرة وكل الانشطة اللي كنت باعملها وقفتها ماهو مفيش وقت وباقي اليوم باقضية في السرير.....دا حتى رمضان عدا من غير ما احس بيه اصلا.... يعني مربوط في ساقية زي العجول اللي اندبحت امبارح....عامة اهي سنة التحول والتغيير خلص......وعلى راي الدكتور اللي قال للمريض انت هيجلك سكر لمدة عشر سنين وبعدين...........تتعود عليه................الحمد لله

كل سنة وانتو طيبين وربنا يجعلك يا 2007 سنة خير على الناس الكويسة

حكاية مش عارف عارف استفيد منها بإيه

2006-12-26T19:05:00.000-08:00

المكان خارج صيدلية ...... الزمان يوم من نوفمبر الساعة 2 صباحا
الحدث: ماهو ده اللي أنا جاي أقوله
الواد الدليفري وعامل النضافة قاعدين يتسايروا (على رأي واحد صاحبنا: بيقولوا كلام عبيط ويضحكوا عليه) بعد الشغل ما خف .جالهم واد من شباب الشوارع المدمنين كلا (ماهم ولاد الشوارع كبروا وبقوا حلاليف) وبيقولهم عايز فلوس
ولاجل ماهم كانوا ادوه مره قبل كده فكان طمعان انهم هيدوا (هم كانوا بيدوه من باب الشفقة بس) المهم كان آخر الشهر فقالولو مفيش راح الشب الكلجى عمل ايه....... طلعلهم سكينة من جيبة وقاللهم لا ادوني اللي معاكو بدال ماتتعوروا
وعشان هو كان مسطول فقالولوا طب سانية نجيبلك من فوق (من الدكاترة )وهو وافق...... ولاقينا اللي داخلين وشهم مصفر وكل واحد اللي خارج بشومة واللي خارج بجنزير الواد شافهم اترعب وقاللهم كده ترفعوا عليا سلاح دانا غلبان وعايز لقمة قالولوا طب فضها سيرة ولو جيت هنا تاني هتتقطع
قبل مايمشي مين لحق اللمة دي .........شباب النواصي راحوا متلمييم وعايزين يولعوها وخطفوا من المسطول سكينته وقعدوا يعاكسوا بيها ويقولوا ماتشيلش حاجة مش قدها تاني
ناقص مين عشان الحفلة تكمل.....................صح البوليس...عربية دورية معدية لقت التجمع راحت واقفة لقت اللي في ايده سكينة واللي في ايده جنزير وكله متلم حولين واحد .....نزلوا خدوا السكينة من العيال وسألوا اللي كان شايلها دي بتاعتك
قالهم لأ دي بتاعة البلطجي ده (قصده على الكولجي) واحنا لقيناه هيعور بيها العيال دول (عمال الصيدلية ) فخطفناها منه.....وبما إن الواد كان شكله مبرشم والعيال شكلها نضيف فراح ماسك الواد و هاتك ياضربوالواد مش حاسس بحاجة عشان هو مبرشم ...........جبت السكينة دي منين ياد ...............مايردش ويقول ياباشا اضرب وانا مش وجعاني لحد ما عفقوه ضرب وكسروا على دماغه الشومة عشان يعترف إنه كان بيحاول يعمل سطو مسلح على الصيدلية!!!!!!!!!!!!! وهو مش هنا أصلا ويبادل الضابط نظرات بكل بلاهة.
لما لقوا مفيش فايدة خدوه في عربية الأمن وقالوا لازم اتنين شهود يشهدوا عليه ...............وقالوا للواد الدليفري والعامل إنهم أحسنلهم ييجوا يشهدوا عليه عشان ياخد حكم وما يستجراش ييجي الصيدلية أو يضايقهم تاني وبالفعل ركب الاتنين وفي بالهم أن يشهدوا عليه إنه كان عايز يعمل سطو مسلح وساعتها ياخد سنتين ثلاثة يبقى نسي الصيدلية والكلا (اصله لو اتاخد تحري بس أو حيازة أسلحة كبيره هياخد ثلاثة أشهر وهيطلع عشان ينتقم وهومتشرد أصلا....هكذا أكد الضابط للعاملين)

في القسم الضابط اتوصو بالواد الكلجي وحتى الشاهدان خدوا كام قفا لحد ما الضابط قال للمخبيرين إن دول شهود بس.......خدوا أقوالهم وقالولهم بكرة تيجوا النيابة عشان نكمل التحقيق

راحوا النيابة وشهدوا والواد اتحبس على ذمة القضية (محاولة سرقة بالإكراه )لحين عرضة على المحكمة

بعد يومين لقينا الواد العامل بيقوللنا وهو مرعوب ..............اسكتوا مش الواد الكلجي قطع صباعه وعمل هليلة في السجن فالضابط طلعه بكفاله وهمية عشان الواد ميعملش شوشرة ويقول إنه كان بيتعذب في السجن وإن الواد دلوقتي حر طليق لحد ميعاد المحاكمة طبعا هو كان مفزوع إن الواد ييجي ينتقم من اللي شهدوا عليه بس ده محصلش صراحة.......

بعد اسبوعين عقدت محكمة غيابية للمتهم اللي كان طبعا هرب بعد ما أفرجوا عنه ولم يتم العثور عليه ........ وحكم غيابيا على فتى الكلا بالسجن ثلاثة سنوات (طبعا بعد سماع شهادة الشهود) ولا يزال البحث مستمرا عن فتى الكلا الذي دخل موسوعة الهاربون من الأحكام ولايزال الرعب يعتري أحيانا العمال لدينا من عودته (خاصة أنه في حالة مشابهة لتلك قام احد الكلجية بقتل ابن بواب بلغ عنه البوليس في قضية مشابهة .............. اينعم الواد اخد فيها تأبيده ولكن من قال أن هؤلاء يخافون السجن أو يكرهوه حتى يكون ردعا لهم)

في النهاية أسأل .................نستفيد ايه من القصة دي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تفاصيل تفاصيل حاجة تقرف

2006-12-20T18:25:00.000-08:00

مشكلتي وأظنها مش مشكلتي لوحدي هي الكره الشديد للتفاصيل ...... أي تفاصيل جايز لأني ذكر والذكور أقل اهتماما بالتفاصيل من الإناث و جايز أو دا الأكيد علشان المقولة الصحيحة جدا اللي بتقول

(devil lies in details)
أو الشيطان يكمن في التفاصيل "دي ولا آية ولا حديث ولا ليها دعوة بالدين " بس جت في الجون وفي الثمانيات كمان.على فكرة واحد صاحبي قاللي إن الجملة دي هي من أبجديات المفاوضات و معاهدات السلام.

المشكلة إننا في الحياة اليومية غارقانين في التفاصيل ولا نكاد نفيق من تفاصيل شئ إلا عشان نتردم ورا تفاصيل شئ تاني كل دا من غير ما نكون شايفين الصورة الكبيرة ... يعني مثال كل واحد في مهنته بيبقى فيه تفاصيل كتير أوي عمال مشغول فيها ودي إزاي ودي ايه وده ليه وهو في الآخر بيشتغل لسبب ربما تلهيه هذا التفاصيل عنه أو ربما ينسى هو بيشتغل ايه فعلا من كتر تفاصيل الشغل الروتينية اللي ليها الابتكارية الخاصة بيها بعيدا عن الشغل نفسه يعني ممكن تلاقي واحد بيشتغل عشان يبني أسرة تكون نواه المجتمع وهو في الحقيقو بياخد رشاوي أو بيعطل شغل فلان عشان هو دايقة في معرفش ايه والحق حق. ولا واحدة من بتوع حقوق المرأة بتشتغل عشان تثبت نفسها وهي كل ما تخش على مديرها تتمايص عشان تمشي أمورها ولا تلبس مفتوح علىشان تترقى بسرعة ما هو أنا مش اقل من ميمي وتوتو ماهم كلهم بيلبسوا كده.

مثال تاني تلاقي في ناس كتير متدينين جدا ورايحين جايين عالمسجد وما بيفتوش سنة ويتناقشوا في مواضيع تفصيلية جدا إنما لو تسألهم عن العقيدة وواحد حاول ينكشهم كده ولا كده يقع على طول لأنه مش باني على أساس لا دا باني على تفاصيل و عكسهم ناس تانية علمانيين عمرهم ما بيصلوا و مشغولين بكتاب نزل لمفكر فرنساوي ولا انجليزي وكان قصده ايه بالمقطع ده وده وهنسهر فين الليلة وغارقانين في التقاصيل ويمكن لو واحد متدين ركز مع واحد من العلمانيين دول يلاقي إنه ولا فكره علماني ولا حاجة بس هو مخه اتشغل بالأفكار دي ولا اتربى في بيئة كده ومابقاش فاضي يفكر بعقليه صافية عن الصورة الكبيرة.

ولا واحد زيي متخرج من كلية صيدلة (اللي هم مفروض يخترعوا أدوية) وكل اللي يفكر فيه أشتغل مندوب ولا في صيدلية ولا في الخليج ولا معيد أنهي هيجيب أكتر عشان أعمل فلوس اتجوز بيها واشتري العربية دا العربيات غليت أوي ولا الحق اعمل نشروع بعدها يعيشني أنا ومراتي ..................كل ده وهو أصلا صيدلي يعني مهنته هي اللي يتوقف عليها وجود الدواء (ودي أحد عناصر الأمن القومي على فكرة) بس الصورة الكبيرة راحت ...عليها العوض في عصر التفاصيل

طب داحنا أيام الكلية أنا وحبة زملا فكرنا نعمل أسرة بأفكارنا و كانت الصورة واضحة للي عايزين نعمله بس حبه حبه دخلت تفاصيل الموضوع إزاي هنخلي الطلبة يخشوا معانا إيه الأنشطة اللي هتعملها مين الدكتور اللي هيبقى مشرف علينا وكل تفصيل يدخلنا في تفصيل لحد ما فكرة الأسرة الأساسية (من وجهة نظري أنا ) راحت خالص يعني تقريبا الأجيال اللي موجودة دلوقتي تعرف طشاش إحنا كنا عاملين الأسرة ليه.

فاكرين كل واحد فينا وهو صغير كان بيحلم بايه اللي بيحلم إنه يبقى مهندس واللي بتحلم إنها تبقى دكتورة يمكن بقوا بس مابقوش اللي كان نفسهم فيه خالص – الخواجة شوشو بهدل التفاصيل وخلانا كلنا نركز على أي حاجة إلا الصورة الكبيرة

الغريب يا أخيإن لما التفاصيل تبفى ماشية مع الصورة الكبيرة بتبقى النتيجة فظيعة (بس دي حالات نادرة)يعني بص على الشعر العربي القديم كده هتلاقي التفاصيل بتاعت البيت فيها روح الفكرة الرئيسية نفسها..............زي ماكنا بناخد في الشعر زمان لما يكون البيت حزين تلاقي الشاعر منقي كلام في شين وفاء كتير أو زي ماتلاقي فيلم بوليسي والكاميرا عماله تجري فيه بسرعة تقول دا الفيلم تفاصيله حلوة ليه لأنها ماشية مع الفكرة الرئيسية
بس على فكرة الشاعر والمخرج ده طلع ميتينه لغايه ماعرف يولف الفكرة على تفاصيل تنفعلها
إنما هنا في مصر التفاصيل بتقول إن المرتبات بتاعة المهنة الفلانية كويسة في بدلية العمر كله يجري عليها اللي بيحبها واللي مش طايقها واللي ماينفعش فيها كله عشان تفصيل صغير غير حياته كلها (ولو إنه مش صغير أوي يعني) بغض النظر بقى عن احتياج البلد للمهنة دي ولا مستقبلها ولا أي حاجة مش مشكلة المهم التفاصيل.

ربنا يكفينا شر التفاصيل وشر المستخبي فيها

مقدمة منطقية واستهلال لابد منه

2006-12-15T18:12:00.000-08:00

السلام عليكم
المفروض إن ده أول بوست ليا .....وعشان كده هاخد رحتي فيه لأن المحاولات الأولى لازم يبقى فيها أخطاء نتعلم منها وعلى رأي المثل من كثر كلامه كثر خطأه السؤال اللي بسأله لنفسي دلوقتي هو أنا من الأساس بعمل مدونه ليه.....جايز عشان موضه....طب وانا من امتى ماشى ورا الموضه دانا بابا كان عنده جاكت عاجبني اشتراه قبل الحرب و رمنه علشان داق عليه...بس عاجبني فقعدت البسه لغاية السنه اللي فاتت مع إنه موديل من ايام قوموا واقعدوا

يمكن عشان مناضل سياسي وليا بعد نظر وفكر تحليلي...بلاش اشتم نفسي بس ده هيبقى أخر سبب منطقى ...أينعم انا زي كل الناس كان نفسي وانا صغير ابقى ريس (والله وانا صغير بس لنلبس مصيبة وللا حاجه) لغايه ماعرفت إن كل قياده مسؤليه وعبء وحسلب عسير في الآخره وحاشية سوده بعيد عنكم (هو مش بعيد أوي بس أهو) وشعب عايز ضرب الجزم لا مؤاخذه يعني بس خلينا صرحاء مع بعض ......احنا بلدنا دي مش محتاجه تغييير في القيادات لا دي محتاجة شعب من الأول يكون عنده دم . وبعدين كنت فاكر إن ده غلط و سلبية لحد ما عرفت إن الكثير من صحابة النبي كانوا حلفين على نفسهم لا يتأمروا ولو على اثنين مخافة فتنة المناصب .....وأنا بصراحة أكيد أسوأ منهم

طب نرجع مرجوعنا ...ايه لزمة عمل مدونة ....اديني بفكر اهو يمكن عايز أعبر عن وجهة نظري في الدنيا ....جايز ولو أنا بني آدم من اللي بينطبق عليهم المثل اللي بيقول (ربك لما قسم العقول كل واحد عجبه عقله)
يعني سواء كان رأيي صح او غلط فأنا مبسوط بمخي كده.

يتهيألي اللي قرا الكلام اللي فات ده ممكن يستنتج زي مانا لسه مستنتج انا ليه عايز أعمل مدونه.........عشان اتكلم وأرغي و افضفض في أي حاجة مع ناس دماغهم نظيفة (بس كلام أهبل يعني) بعيد عن الشغل والصيدلة والأدوية اللي بقيت بكرهها أكتر من العيانين الغلابة اللي بيجولنا. والله بقى اتكلم مره في السياسة في الكورة في الإنسانيات في التاريخ (الحاجة الوحيده تقريبا اللي بفهم فيها) أهو بقى زي ماتكون طالباها

يمكن البعض يقول ايه المدونة الهايفة دي بس في رأيي الكلام الكبير ما بيعملش غير فرقعة تولع وتطفي واللي عايز يغير الكون عمرة ما بيعرف .......بس على رأي كونفوشيوس لما قالولو إن الحرب قامت فقال طب يللا نساعد صياد........اهو ده افيد للمجتمه من صراخ وعويل وكلام إنشا (والله أنا ما بشتم في حد ولكن هذا رأيي) ألى اللقاء في أول بوست بجد