كل سنة وانتو طيبين

أولا كل سنة وكل الناس طيبة بمناسبة العيد ....اللي ماخدتش فيه غير يوم واحد اجازة.......وثانية بمناسبة راس السنة الجديدة اللي السنة دي بالذات دونا عن كل السنين باحتفل بيه.........اخيرا خلصت 2006 دي داحاجة خنقا ياجدع فين ايام 2005 وللا 2004 لالالالا 2004 دي ماكانتش قد كده بس هي اللي كانت جامده صراحة2005

صراحة 2006ماكنتش بالنسبة لي سنة عادية .............لا دي زيها 1984وزي 2001 واهم بكتير(يعني انا اتولدت 84 بس ماعملتش أي مجهود ساعتها و دخلت الكلية 2001 وده تاريخ مهم بس خرجت منها..وياريتني ماخرجت 2006) و هافضل طول عمري خريج 2006 فاكر السنة دي بكل حذافيرها من أول امتحان السيوتيكال اللي ماكنتش مذاكر نصه لحد العيد الكبير اللي نزلت الصيدلية تلات ايام منه وخدت يوم واحد اجازة

2006 مشكلتها الأساسية انها كانتسنة الواقع .........الارتطام والاصطدام بالواقع انا كنت في الكلية باخد مصروفي من ابويا وعايش ميت فل وماباخدش دروس عشان ماتقلش عليه .......... وبتفسح زي مانا عايز واذاكر وقت مانا عايز..........اينعم مكنتش مرفه نفسي أوي بس كانت كل حاجة عايزها باجيبها ولو بعد حين. كنت مع كده بحب اعمل انشطة وبحب اعمل حاجات مفيدة للبلد(ماعلينا من الحته دي عشان ماعيش في دور مصطفى كامل)بس القصد اني ماكنتش بني ادم تافه والحمد لله

بس مره واحده يوم 31-6-2006 لقيت نفسي ماعنديش كلية ...خلصت خلاص ...... يبقى لازم اعمل ايه لازم اشتغل واخلص ورق الجيش واخلص ورق التلكيف و اخلص كارنيه مزاولة المهنة وابتدي احوش عشان لو عايز اتجوز كان في دماغي إن الحياة بمبي ....إلا ان اصطدمت بالواقع ...كل حاجة عشان تتعمل بتاخد شهر وكل شوية يطلعلك موظف حمار يبوظلك الدنيا في الورق وبعدين بالليل تلاقي زبون حمار في الصيدلية تبقى عايز تولع في هدومك..........بس عدت السنة واخدنا الإعفا (بالمناسبة اخلص دعواتي لجميع الإخوة اللي داخلين الجيش وربنا معاهم بجد) وطلعنا الكارنيه وعملت الرخصة واشتغلت في صيدليتين دفعة واحدة ................كل ده حلو بس في حاجة ناقصة....... والله ما بطر على النعمة الحمد لله في ناس مش لاقيين النعمة اللي انا فيها بس ايام الكلية كنت ببقى نايم عارف اننا بكرة في الكلية وبعده فيها ولغاية ماخلصها عارف انا رايح فين وجاي منين انما بعد الكلية الواحد مابقاش عارف حاجة الله اعلم السنة اللي جاية هاشتغل وللا هاترفد وللا هسافر وللا هاحوش وللا التحويش كله هيضيع...........الواحد فضل طول عمره reacting واول مرة يقلب يبقى acting بتبقى صعبه خاصة في بلد زي مصر حالتها بالبلا والواحد عايز يحوش ويتجوز ويحج ويفتح مشروع يجيبله دخل يلاقي نفسه بيشتغل حوالي 12 ساعة يوميا بافضل شهادة فيكي يامصر وفي الاخر المرتب يبقى متواضع جدا يكفى النفقات بالكادو ما ينفش يتحوش منه..............دا غيرإن شغل 12 ساعة يوميا بما فيها الجمعة حارمك من مناسبات اجتماعية كتيرة وكل الانشطة اللي كنت باعملها وقفتها ماهو مفيش وقت وباقي اليوم باقضية في السرير.....دا حتى رمضان عدا من غير ما احس بيه اصلا.... يعني مربوط في ساقية زي العجول اللي اندبحت امبارح....عامة اهي سنة التحول والتغيير خلص......وعلى راي الدكتور اللي قال للمريض انت هيجلك سكر لمدة عشر سنين وبعدين...........تتعود عليه................الحمد لله

كل سنة وانتو طيبين وربنا يجعلك يا 2007 سنة خير على الناس الكويسة

حكاية مش عارف عارف استفيد منها بإيه

المكان خارج صيدلية ...... الزمان يوم من نوفمبر الساعة 2 صباحا
الحدث: ماهو ده اللي أنا جاي أقوله
الواد الدليفري وعامل النضافة قاعدين يتسايروا (على رأي واحد صاحبنا: بيقولوا كلام عبيط ويضحكوا عليه) بعد الشغل ما خف .جالهم واد من شباب الشوارع المدمنين كلا (ماهم ولاد الشوارع كبروا وبقوا حلاليف) وبيقولهم عايز فلوس
ولاجل ماهم كانوا ادوه مره قبل كده فكان طمعان انهم هيدوا (هم كانوا بيدوه من باب الشفقة بس) المهم كان آخر الشهر فقالولو مفيش راح الشب الكلجى عمل ايه....... طلعلهم سكينة من جيبة وقاللهم لا ادوني اللي معاكو بدال ماتتعوروا
وعشان هو كان مسطول فقالولوا طب سانية نجيبلك من فوق (من الدكاترة )وهو وافق...... ولاقينا اللي داخلين وشهم مصفر وكل واحد اللي خارج بشومة واللي خارج بجنزير الواد شافهم اترعب وقاللهم كده ترفعوا عليا سلاح دانا غلبان وعايز لقمة قالولوا طب فضها سيرة ولو جيت هنا تاني هتتقطع
قبل مايمشي مين لحق اللمة دي .........شباب النواصي راحوا متلمييم وعايزين يولعوها وخطفوا من المسطول سكينته وقعدوا يعاكسوا بيها ويقولوا ماتشيلش حاجة مش قدها تاني
ناقص مين عشان الحفلة تكمل.....................صح البوليس...عربية دورية معدية لقت التجمع راحت واقفة لقت اللي في ايده سكينة واللي في ايده جنزير وكله متلم حولين واحد .....نزلوا خدوا السكينة من العيال وسألوا اللي كان شايلها دي بتاعتك
قالهم لأ دي بتاعة البلطجي ده (قصده على الكولجي) واحنا لقيناه هيعور بيها العيال دول (عمال الصيدلية ) فخطفناها منه.....وبما إن الواد كان شكله مبرشم والعيال شكلها نضيف فراح ماسك الواد و هاتك ياضربوالواد مش حاسس بحاجة عشان هو مبرشم ...........جبت السكينة دي منين ياد ...............مايردش ويقول ياباشا اضرب وانا مش وجعاني لحد ما عفقوه ضرب وكسروا على دماغه الشومة عشان يعترف إنه كان بيحاول يعمل سطو مسلح على الصيدلية!!!!!!!!!!!!! وهو مش هنا أصلا ويبادل الضابط نظرات بكل بلاهة.
لما لقوا مفيش فايدة خدوه في عربية الأمن وقالوا لازم اتنين شهود يشهدوا عليه ...............وقالوا للواد الدليفري والعامل إنهم أحسنلهم ييجوا يشهدوا عليه عشان ياخد حكم وما يستجراش ييجي الصيدلية أو يضايقهم تاني وبالفعل ركب الاتنين وفي بالهم أن يشهدوا عليه إنه كان عايز يعمل سطو مسلح وساعتها ياخد سنتين ثلاثة يبقى نسي الصيدلية والكلا (اصله لو اتاخد تحري بس أو حيازة أسلحة كبيره هياخد ثلاثة أشهر وهيطلع عشان ينتقم وهومتشرد أصلا....هكذا أكد الضابط للعاملين)

في القسم الضابط اتوصو بالواد الكلجي وحتى الشاهدان خدوا كام قفا لحد ما الضابط قال للمخبيرين إن دول شهود بس.......خدوا أقوالهم وقالولهم بكرة تيجوا النيابة عشان نكمل التحقيق

راحوا النيابة وشهدوا والواد اتحبس على ذمة القضية (محاولة سرقة بالإكراه )لحين عرضة على المحكمة

بعد يومين لقينا الواد العامل بيقوللنا وهو مرعوب ..............اسكتوا مش الواد الكلجي قطع صباعه وعمل هليلة في السجن فالضابط طلعه بكفاله وهمية عشان الواد ميعملش شوشرة ويقول إنه كان بيتعذب في السجن وإن الواد دلوقتي حر طليق لحد ميعاد المحاكمة طبعا هو كان مفزوع إن الواد ييجي ينتقم من اللي شهدوا عليه بس ده محصلش صراحة.......

بعد اسبوعين عقدت محكمة غيابية للمتهم اللي كان طبعا هرب بعد ما أفرجوا عنه ولم يتم العثور عليه ........ وحكم غيابيا على فتى الكلا بالسجن ثلاثة سنوات (طبعا بعد سماع شهادة الشهود) ولا يزال البحث مستمرا عن فتى الكلا الذي دخل موسوعة الهاربون من الأحكام ولايزال الرعب يعتري أحيانا العمال لدينا من عودته (خاصة أنه في حالة مشابهة لتلك قام احد الكلجية بقتل ابن بواب بلغ عنه البوليس في قضية مشابهة .............. اينعم الواد اخد فيها تأبيده ولكن من قال أن هؤلاء يخافون السجن أو يكرهوه حتى يكون ردعا لهم)

في النهاية أسأل .................نستفيد ايه من القصة دي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تفاصيل تفاصيل حاجة تقرف

مشكلتي وأظنها مش مشكلتي لوحدي هي الكره الشديد للتفاصيل ...... أي تفاصيل جايز لأني ذكر والذكور أقل اهتماما بالتفاصيل من الإناث و جايز أو دا الأكيد علشان المقولة الصحيحة جدا اللي بتقول

(devil lies in details)
أو الشيطان يكمن في التفاصيل "دي ولا آية ولا حديث ولا ليها دعوة بالدين " بس جت في الجون وفي الثمانيات كمان.على فكرة واحد صاحبي قاللي إن الجملة دي هي من أبجديات المفاوضات و معاهدات السلام.

المشكلة إننا في الحياة اليومية غارقانين في التفاصيل ولا نكاد نفيق من تفاصيل شئ إلا عشان نتردم ورا تفاصيل شئ تاني كل دا من غير ما نكون شايفين الصورة الكبيرة ... يعني مثال كل واحد في مهنته بيبقى فيه تفاصيل كتير أوي عمال مشغول فيها ودي إزاي ودي ايه وده ليه وهو في الآخر بيشتغل لسبب ربما تلهيه هذا التفاصيل عنه أو ربما ينسى هو بيشتغل ايه فعلا من كتر تفاصيل الشغل الروتينية اللي ليها الابتكارية الخاصة بيها بعيدا عن الشغل نفسه يعني ممكن تلاقي واحد بيشتغل عشان يبني أسرة تكون نواه المجتمع وهو في الحقيقو بياخد رشاوي أو بيعطل شغل فلان عشان هو دايقة في معرفش ايه والحق حق. ولا واحدة من بتوع حقوق المرأة بتشتغل عشان تثبت نفسها وهي كل ما تخش على مديرها تتمايص عشان تمشي أمورها ولا تلبس مفتوح علىشان تترقى بسرعة ما هو أنا مش اقل من ميمي وتوتو ماهم كلهم بيلبسوا كده.

مثال تاني تلاقي في ناس كتير متدينين جدا ورايحين جايين عالمسجد وما بيفتوش سنة ويتناقشوا في مواضيع تفصيلية جدا إنما لو تسألهم عن العقيدة وواحد حاول ينكشهم كده ولا كده يقع على طول لأنه مش باني على أساس لا دا باني على تفاصيل و عكسهم ناس تانية علمانيين عمرهم ما بيصلوا و مشغولين بكتاب نزل لمفكر فرنساوي ولا انجليزي وكان قصده ايه بالمقطع ده وده وهنسهر فين الليلة وغارقانين في التقاصيل ويمكن لو واحد متدين ركز مع واحد من العلمانيين دول يلاقي إنه ولا فكره علماني ولا حاجة بس هو مخه اتشغل بالأفكار دي ولا اتربى في بيئة كده ومابقاش فاضي يفكر بعقليه صافية عن الصورة الكبيرة.

ولا واحد زيي متخرج من كلية صيدلة (اللي هم مفروض يخترعوا أدوية) وكل اللي يفكر فيه أشتغل مندوب ولا في صيدلية ولا في الخليج ولا معيد أنهي هيجيب أكتر عشان أعمل فلوس اتجوز بيها واشتري العربية دا العربيات غليت أوي ولا الحق اعمل نشروع بعدها يعيشني أنا ومراتي ..................كل ده وهو أصلا صيدلي يعني مهنته هي اللي يتوقف عليها وجود الدواء (ودي أحد عناصر الأمن القومي على فكرة) بس الصورة الكبيرة راحت ...عليها العوض في عصر التفاصيل

طب داحنا أيام الكلية أنا وحبة زملا فكرنا نعمل أسرة بأفكارنا و كانت الصورة واضحة للي عايزين نعمله بس حبه حبه دخلت تفاصيل الموضوع إزاي هنخلي الطلبة يخشوا معانا إيه الأنشطة اللي هتعملها مين الدكتور اللي هيبقى مشرف علينا وكل تفصيل يدخلنا في تفصيل لحد ما فكرة الأسرة الأساسية (من وجهة نظري أنا ) راحت خالص يعني تقريبا الأجيال اللي موجودة دلوقتي تعرف طشاش إحنا كنا عاملين الأسرة ليه.

فاكرين كل واحد فينا وهو صغير كان بيحلم بايه اللي بيحلم إنه يبقى مهندس واللي بتحلم إنها تبقى دكتورة يمكن بقوا بس مابقوش اللي كان نفسهم فيه خالص – الخواجة شوشو بهدل التفاصيل وخلانا كلنا نركز على أي حاجة إلا الصورة الكبيرة

الغريب يا أخيإن لما التفاصيل تبفى ماشية مع الصورة الكبيرة بتبقى النتيجة فظيعة (بس دي حالات نادرة)يعني بص على الشعر العربي القديم كده هتلاقي التفاصيل بتاعت البيت فيها روح الفكرة الرئيسية نفسها..............زي ماكنا بناخد في الشعر زمان لما يكون البيت حزين تلاقي الشاعر منقي كلام في شين وفاء كتير أو زي ماتلاقي فيلم بوليسي والكاميرا عماله تجري فيه بسرعة تقول دا الفيلم تفاصيله حلوة ليه لأنها ماشية مع الفكرة الرئيسية
بس على فكرة الشاعر والمخرج ده طلع ميتينه لغايه ماعرف يولف الفكرة على تفاصيل تنفعلها
إنما هنا في مصر التفاصيل بتقول إن المرتبات بتاعة المهنة الفلانية كويسة في بدلية العمر كله يجري عليها اللي بيحبها واللي مش طايقها واللي ماينفعش فيها كله عشان تفصيل صغير غير حياته كلها (ولو إنه مش صغير أوي يعني) بغض النظر بقى عن احتياج البلد للمهنة دي ولا مستقبلها ولا أي حاجة مش مشكلة المهم التفاصيل.

ربنا يكفينا شر التفاصيل وشر المستخبي فيها

مقدمة منطقية واستهلال لابد منه

السلام عليكم
المفروض إن ده أول بوست ليا .....وعشان كده هاخد رحتي فيه لأن المحاولات الأولى لازم يبقى فيها أخطاء نتعلم منها وعلى رأي المثل من كثر كلامه كثر خطأه السؤال اللي بسأله لنفسي دلوقتي هو أنا من الأساس بعمل مدونه ليه.....جايز عشان موضه....طب وانا من امتى ماشى ورا الموضه دانا بابا كان عنده جاكت عاجبني اشتراه قبل الحرب و رمنه علشان داق عليه...بس عاجبني فقعدت البسه لغاية السنه اللي فاتت مع إنه موديل من ايام قوموا واقعدوا

يمكن عشان مناضل سياسي وليا بعد نظر وفكر تحليلي...بلاش اشتم نفسي بس ده هيبقى أخر سبب منطقى ...أينعم انا زي كل الناس كان نفسي وانا صغير ابقى ريس (والله وانا صغير بس لنلبس مصيبة وللا حاجه) لغايه ماعرفت إن كل قياده مسؤليه وعبء وحسلب عسير في الآخره وحاشية سوده بعيد عنكم (هو مش بعيد أوي بس أهو) وشعب عايز ضرب الجزم لا مؤاخذه يعني بس خلينا صرحاء مع بعض ......احنا بلدنا دي مش محتاجه تغييير في القيادات لا دي محتاجة شعب من الأول يكون عنده دم . وبعدين كنت فاكر إن ده غلط و سلبية لحد ما عرفت إن الكثير من صحابة النبي كانوا حلفين على نفسهم لا يتأمروا ولو على اثنين مخافة فتنة المناصب .....وأنا بصراحة أكيد أسوأ منهم

طب نرجع مرجوعنا ...ايه لزمة عمل مدونة ....اديني بفكر اهو يمكن عايز أعبر عن وجهة نظري في الدنيا ....جايز ولو أنا بني آدم من اللي بينطبق عليهم المثل اللي بيقول (ربك لما قسم العقول كل واحد عجبه عقله)
يعني سواء كان رأيي صح او غلط فأنا مبسوط بمخي كده.

يتهيألي اللي قرا الكلام اللي فات ده ممكن يستنتج زي مانا لسه مستنتج انا ليه عايز أعمل مدونه.........عشان اتكلم وأرغي و افضفض في أي حاجة مع ناس دماغهم نظيفة (بس كلام أهبل يعني) بعيد عن الشغل والصيدلة والأدوية اللي بقيت بكرهها أكتر من العيانين الغلابة اللي بيجولنا. والله بقى اتكلم مره في السياسة في الكورة في الإنسانيات في التاريخ (الحاجة الوحيده تقريبا اللي بفهم فيها) أهو بقى زي ماتكون طالباها

يمكن البعض يقول ايه المدونة الهايفة دي بس في رأيي الكلام الكبير ما بيعملش غير فرقعة تولع وتطفي واللي عايز يغير الكون عمرة ما بيعرف .......بس على رأي كونفوشيوس لما قالولو إن الحرب قامت فقال طب يللا نساعد صياد........اهو ده افيد للمجتمه من صراخ وعويل وكلام إنشا (والله أنا ما بشتم في حد ولكن هذا رأيي) ألى اللقاء في أول بوست بجد